പ്രധാനമന്ത്രി നരേന്ദ്രമോദിയ്ക്കെതിരെ മോശം പരാമർശം നടത്തിയതിനെ തുടർന്ന് കോൺഗ്രസ് നേതാവ് രാഹുൽ ഗാന്ധിക്ക് തിരഞ്ഞെടുപ്പ് കമ്മിഷൻ നോട്ടീസ് അയച്ചു. പ്രധാനമന്ത്രി ദുശ്ശകുനമാണെന്നും പോക്കറ്റടിക്കാരനെ പോലെയാണെന്നും രാഹുൽ പറഞ്ഞിരുന്നു. ഇതേ തുടർന്ന് വയനാട് എംപിക്കെതിരെ ബിജെപി തിരഞ്ഞെടുപ്പ് കമ്മീഷന് പരാതി നൽകിയിരുന്നു. അതിന് തൊട്ടുപിന്നാലെയാണ് ഈ നോട്ടീസ്. ശനിയാഴ്ച വൈകിട്ട് ആറു മണിക്കുള്ളിൽ മറുപടി നൽകണമെന്ന് രാഹുൽ ഗാന്ധിയോട് കമ്മീഷൻ ആവശ്യപ്പെട്ടു. മാതൃകാ പെരുമാറ്റച്ചട്ടം ലംഘിച്ചതിന് നടപടിയെടുക്കാതിരിക്കാനുള്ള കാരണം വിശദീകരിക്കണമെന്നും കമ്മീഷൻ ആവശ്യപ്പെട്ടുരാജസ്ഥാനിൽ നടന്ന ഒരു തെരഞ്ഞെടുപ്പ് റാലിയിലാണ് രാഹുൽ ഗാന്ധി പ്രധാനമന്ത്രിയെ ‘ദുശ്ശകുനം’ എന്ന് വിളിച്ച് പരിഹസിച്ചത്. അദ്ദേഹത്തിന്റെ പ്രവേശനമാണ് ഓസ്ട്രേലിയയ്ക്കെതിരായ 2023 ലോകകപ്പ് ഫൈനൽ മത്സരത്തിൽ ഇന്ത്യ പരാജയപ്പെടാൻ കാരണമെന്നും രാഹുൽ പറഞ്ഞു
ഒരു പ്രധാനമന്ത്രിയ്ക്കെതിരെ ദുശ്ശകുനം, പോക്കറ്റടിക്കാരൻ എന്നീ വാക്കുകൾ ഉപയോഗിക്കുന്നത് ദേശീയ രാഷ്ട്രീയ പാർട്ടിയിലെ മുതിർന്ന നേതാവിന് ചേരുന്നതല്ലെന്നും കമ്മീഷൻ വിലയിരുത്തി. ദുശ്ശകുനം എന്ന പ്രയോഗം നിരോധനത്തിന്റെ ഭാഗത്തിൽ ഉൾപ്പെടുന്നുവെന്നും കമ്മീഷൻ പറഞ്ഞു.
“തിരഞ്ഞെടുപ്പ് പ്രചാരണ കാലയളവിൽ രാഷ്ട്രീയ നേതാക്കൾ നടത്തുന്ന നിരുത്തരപരമായ പരാമർശങ്ങളിൽ കമ്മീഷൻ ആശങ്ക പ്രകടിപ്പിച്ചു. പൊതു മണ്ഡലങ്ങളിൽ മാന്യതയോടെ പ്രവർത്തിക്കാനുള്ള പൊതു ഉപദേശവും കമ്മീഷൻ മുന്നോട്ടുവച്ചു. പെരുമാറ്റ ചട്ടം, അഭിപ്രായ സ്വാതന്ത്ര്യം എന്നിവ സംബന്ധിച്ച സുപ്രീം കോടതി വിധികളും നോട്ടീസിൽ പരാമർശിക്കുന്നുണ്ട്.
