സഹോദരന്റെ കസ്റ്റഡി മരണം അന്വേഷിക്കണമെന്ന് ആവശ്യപ്പെട്ട് സെക്രട്ടേറിയേറ്റിന് മുന്നില് സമരം ചെയ്തുവന്ന ശ്രീജിത്തിനെ പോലീസ് അറസറ്റ് ചെയതു. വഴിയാത്രക്കാരനെ ആക്രമിച്ച് പരിക്കേല്പ്പിച്ച കേസിലാണിത്. ശ്രീജിത്തിന്റെ ആക്രമണത്തില് വഴിയാത്രക്കാരന്റെ തലയ്ക്ക് ഗുരുതരമായി പരിക്കേറ്റിരുന്നു. ഇതോടെയാണ് ശ്രീജിത്തിനെതിരെ വധശ്രമത്തിന് കേസെടുത്ത് അറസ്റ്റ് ചെയ്തത്.
കഴിഞ്ഞ ദിവസം വൈകിട്ട് ഏഴിനാണ് കേസിനാസ്പദമായ സംഭവം നടന്നത്. രാജാജി നഗര് സ്വദേശി സുരേഷ് കുമാറിനെ ആക്രമിച്ചതിനാണ് കേസ്. നടപ്പാതയിലൂടെ നടക്കുന്നതിനിടെ സുരേഷിനെ ശ്രീജിത്ത് മെക്രോഫോണിലൂടെ അസഭ്യം പറഞ്ഞു. ഇതുകേട്ട് നിനക്ക് എന്തെങ്കിലും ജോലി ചെയ്ത് ജീവിച്ചുകൂടെയെന്ന് സുരേഷ് പ്രതികരിച്ചു. ഇതോടെ പ്രകോപിതനായ ശ്രീജിത്ത് കല്ലുകൊണ്ട് സുരേഷിനെ മാരകമായി ആക്രമിക്കുകയായിരുന്നുവെന്നും പൊലീസ് പറയുന്നു.
പരിക്കേറ്റ സുരേഷിനെ ആദ്യം ജനറല് ആശുപത്രിയില് പ്രവേശിപ്പിച്ചു. തുടര്ന്ന് അവിടെ നിന്ന് മെഡിക്കല് കോളേജിലേക്ക് മാറ്റി. ഒന്പത് വര്ഷമായി സെക്രട്ടേറിയറ്റിന് മുന്നില് സമരം നടത്തുന്ന നെയ്യാറ്റിന്കര സ്വദേശി ശ്രീജിത്ത് മൈക്രോഫോണിലൂടെ അസഭ്യം പറയുന്നത് പതിവായ കാഴ്ചയാണ്.
ശ്രീജിത്തിനെതിരെ മുഖ്യമന്ത്രിയെയും വഴിയാത്രക്കാരെയും അസഭ്യം പറഞ്ഞതിന് നേരെത്തെയും കേസുണ്ട്. അതേസമയം ശ്രീജിത്തിനെ അറസ്റ്റ് ചെയ്തതിന് പിന്നാലെ ഇയാളുടെ സമരപന്തല് കോര്പ്പറേഷന് പൊളിച്ചു നീക്കുകയും ചെയ്തു.
സഹോദരന്റെ കസ്റ്റഡി മരണം അന്വേഷിക്കണമെന്നാവശ്യപ്പെട്ടാണ് സമരം തുടങ്ങിയത്. അന്വേഷണം പൂര്ത്തിയായിട്ടും ശ്രീജിത്ത് സമരം തുടരുകയായിരുന്നു. ഇയാളെ കോടതിയില് ഹാജരാക്കി റിമാന്ഡ് ചെയ്തു.
