ഉപതിരഞ്ഞെടുപ്പ് തീയതി പ്രഖ്യാപിച്ച് മണിക്കൂറുകൾക്കകം സ്ഥാനാർത്ഥികളെ പ്രഖ്യാപിച്ച് കോൺഗ്രസ്. വയനാട് ലോക്സഭാ മണ്ഡലത്തിലേക്കും പാലക്കാട്, ചേലക്കര നിയമസഭാ മണ്ഡലങ്ങളിലേക്കുമുള്ള സ്ഥാനാർത്ഥികളെയാണ് പ്രഖ്യാപിച്ചത്.
എ.ഐ.സി.സി അദ്ധ്യക്ഷൻ മല്ലികാർജുൻ ഖാർഗെയാണ് സ്ഥാനാർത്ഥി പ്രഖ്യാപനം നടത്തിയത്. വയനാട്ടിൽ രാഹുൽ ഗാന്ധിക്ക് പകരക്കാരിയായി പ്രിയങ്ക ഗാന്ധിയെത്തുന്നു എന്നതാണ് ശ്രദ്ധേയം. ചേലക്കരയിൽ മുൻ എം.പി രമ്യ ഹരിദാസാണ് യു.ഡി.എഫ് സ്ഥാനാർത്ഥി.പ്രിയങ്കയുടെ ആദ്യ തിരഞ്ഞെടുപ്പ് സ്ഥാനാർത്ഥിത്വം ആയതിനാൽ തന്നെ വയനാട് ഇത്തവണയും ദേശീയ ശ്രദ്ധയാകർഷിക്കും. ഷാഫി പറമ്പിലിൻ്റെ വിശ്വസ്തനും യൂത്ത് കോൺഗ്രസ് സംസ്ഥാന അദ്ധ്യക്ഷനുമായ രാഹുൽ മാങ്കൂട്ടത്തിലൂടെ മണ്ഡലം നില നിർത്തുകയാണ് കോൺഗ്രസ് ലക്ഷ്യമിടുന്നത്. കഴിഞ്ഞ ലോക്സഭ തിരഞ്ഞെടുപ്പിൽ ചേലക്കര ഉൾപ്പെടുന്ന ആലത്തൂർ മണ്ഡലത്തിൽ നിന്നും രമ്യ ഹരിദാസ് പരാജയപ്പെട്ടിരുന്നു. സഹതാപ തരംഗവും ലോക്സഭ തിരഞ്ഞെടുപ്പിൽ ചേലക്കര മണ്ഡലത്തിൽ കൂടുതൽ വോട്ടുകൾ നേടിയതും രമ്യക്ക് അനുയോജ്യമാകുമെന്നാണ് കോൺഗ്രസ് വിലയിരുത്തൽ.
നവംബർ 13 നാണ് വോട്ടെടുപ്പ്. നവംബർ 23 നാണ് വോട്ടെണ്ണൽ. 28 ദിവസങ്ങൾ മാത്രമാണ് ഇനി തിരഞ്ഞെടുപ്പിനുള്ളത്. ഈ മാസം 25 വരെയാണ് നാമ നിർദേശ പത്രിക സമർപ്പിക്കാനുള്ള അവസാന തീയതി. വയനാട്, റായ്ബറേലി ലോക്സഭാ മണ്ഡലങ്ങളില് രാഹുല് ഗാന്ധി വിജയിച്ചതിനെ തുടര്ന്ന് അദ്ദേഹം വയനാട് മണ്ഡലം ഒഴിഞ്ഞതോടെയാണ് വയനാട് ഉപതിരഞ്ഞെടുപ്പിന് വഴിയൊരുങ്ങിയത്.
പാലക്കാട് എം.എല്.എ. ആയിരുന്ന ഷാഫി പറമ്പില് ലോക്സഭാ തിരഞ്ഞെടുപ്പില് വടകരയില് നിന്ന് വിജയിച്ചതോടെയാണ് പാലക്കാട് ഉപതിരഞ്ഞെടുപ്പിലേക്ക് പോകുന്നത്. ചേലക്കരയിലെ എം.എല്.എ. ആയിരുന്ന കെ.രാധാകൃഷ്ണന് ആലത്തൂര് ലോക്സഭാ മണ്ഡലത്തില് നിന്ന് വിജയിച്ചിരുന്നു. അദ്ദേഹം എം.എല്.എ. സ്ഥാനം ഒഴിഞ്ഞതോടെയാണ് ഈ മണ്ഡലത്തിലും ഉപതിരഞ്ഞെടുപ്പിനെ കളമൊരുങ്ങിയിരിക്കുന്നത്.
മൂന്ന് സീറ്റുകളിലും കോൺഗ്രസ് വിജയം നേടുമെന്ന് എ.ഐ.സി.സി ജനറൽ സെക്രട്ടറി കെ.സി വേണുഗോപാൽ പറഞ്ഞു. എട്ട് വർഷക്കാലമായുള്ള സി.പി.എം ഭരണത്തിൻ്റെ ജീർണതകൾക്കുള്ള മറുപടിയാകും തിരഞ്ഞെടുപ്പ് ഫലമെന്നും കെ.സി വേണുഗോപാൽ പറഞ്ഞു.
കേരളത്തിലെ ജനങ്ങൾ ആഗ്രഹിക്കുന്ന തിരഞ്ഞെടുപ്പ് വിധിയാകും പാലക്കാട് നൽകുക. തൃശൂർ പൂരം കലക്കാൻ നടത്തിയവർക്കെതിരെയുള്ള പ്രതികരണമാകും പാലക്കാട് നടക്കുകയെന്നും” ഷാഫി പറമ്പിൽ പറഞ്ഞു.
