പ്രധാനമന്ത്രി നരേന്ദ്ര മോദിയുമായി ഫോണിൽ സംസാരിച്ച് ബംഗ്ലാദേശിലെ ഇടക്കാല ഭരണാധികാരി മുഹമ്മദ് യൂനുസ്. ഉഭയകക്ഷി ബന്ധത്തെക്കുറിച്ചും അക്രമബാധിത രാജ്യത്ത് ഹിന്ദുക്കളുടെയും മറ്റ് ന്യൂനപക്ഷ സമുദായങ്ങളുടെയും സുരക്ഷയെ കുറിച്ചും ചർച്ച ചെയ്തതായി നരേന്ദ്രമോദി എക്സിൽ കുറിച്ചു. ബംഗ്ലാദേശിലെ ഹിന്ദുക്കളുടെയും ന്യൂനപക്ഷങ്ങളുടെയും സുരക്ഷ പ്രധാനമന്ത്രിക്ക് ഉറപ്പ് നൽകി
ജനാധിപത്യവും സുസ്ഥിരവും സമാധാനപരവും പുരോഗമനപരവുമായിട്ടുള്ള ബംഗ്ലാദേശിന്റെ വളർച്ചയ്ക്ക് ഇന്ത്യയുടെ പിന്തുണ അറിയിച്ചതായും ഹിന്ദുക്കളുടെയും ന്യൂനപക്ഷങ്ങളുടെയും സംരക്ഷണവും സുരക്ഷയും മുഹമ്മദ് യൂനുസ് ഉറപ്പു നൽകിയതായും പ്രധാനമന്ത്രി വ്യക്തമാക്കി. ബംഗ്ലാദേശിൽ ന്യൂനപക്ഷങ്ങൾക്കെതിരായ ആക്രമണങ്ങൾ അവസാനിപ്പിക്കണമെന്ന് ഇടക്കാലഭരണാധികാരിയായി ചുമതലയേറ്റതിന് പിന്നാലെ യൂനുസ് ആവശ്യപ്പെട്ടിരുന്നു
പ്രക്ഷോഭത്തെത്തുടർന്ന് പ്രധാനമന്ത്രി ഷെയ്ഖ് ഹസീന രാജിവെച്ച് ബംഗ്ലാദേശ് വിട്ടതിനെത്തുടർന്നാണ് യൂനുസിന്റെ നേതൃത്വത്തിൽ ഇടക്കാലസർക്കാർ രൂപവത്കരിക്കാൻ സേനാനേതൃത്വം തീരുമാനിച്ചത്. പ്രധാനമന്ത്രിക്കുതുല്യമായ മുഖ്യ ഉപദേശകൻ എന്നതാണ് യൂനുസിന്റെ പദവി. തിരഞ്ഞെടുപ്പ് നടത്തി പുതിയ സർക്കാരിനെ അധികാരത്തിലെത്തിക്കുക എന്നതാണ് ഇടക്കാല സർക്കാരിന്റെ ചുമതല.
അശാന്തിക്കിടയിലും ബംഗ്ലാദേശിലെ ഹിന്ദുക്കളുടെയും മറ്റ് ന്യൂനപക്ഷങ്ങളുടെയും സുരക്ഷയെക്കുറിച്ച് 140 കോടി ഇന്ത്യക്കാർ ആശങ്കാകുലരാണെന്ന് വ്യാഴാഴ്ച സ്വാതന്ത്ര്യദിന പ്രസംഗത്തിൽ നരേന്ദ്ര മോദി പറഞ്ഞിരുന്നു. മുൻ പ്രധാനമന്ത്രി ഷെയ്ഖ് ഹസീനയെ പുറത്താക്കിയതിന് ശേഷം ന്യൂനപക്ഷങ്ങൾക്കെതിരായ നിരവധി അക്രമ സംഭവങ്ങൾക്കിടയിലാണ് പ്രധാനമന്ത്രിയുടെ പ്രസ്താവന.
അയൽ രാജ്യങ്ങൾ ഐശ്വര്യത്തിൻ്റെയും സമാധാനത്തിൻ്റെയും പാതയിലൂടെ സഞ്ചരിക്കണമെന്നാണ് ഇന്ത്യയുടെ ആഗ്രഹമെന്നും മോദി പറഞ്ഞിരുന്നു.വൻ പ്രതിഷേധങ്ങളെത്തുടർന്ന് ജൂൺ മുതൽ ബംഗ്ലാദേശ് അസ്വസ്ഥതയിലാണ്. ആദ്യം സർക്കാർ ജോലികളിലെ ക്വാട്ടയെച്ചൊല്ലിയുള്ള പ്രക്ഷോഭമായി ഇത് ആരംഭിച്ചെങ്കിലും താമസിയാതെ സർക്കാർ വിരുദ്ധ കലാപമായി മാറുകയായിരുന്നു.
