വെള്ളിയാഴ്ച്ചത്തെ വ്യാപാരത്തിൽ വില കുതിച്ചുയർന്ന ഒരു ഓഹരിയാണ് വീനസ് പൈപ്പ്സ് & ട്യൂബ്സ് ലിമിറ്റഡ് (Venus Pipes and Tubes Limited). 8% വില വർധിച്ച് 1395.35 രൂപയിലാണ് വ്യാപാരം ക്ലോസ് ചെയ്തിരിക്കുന്നത്. ഇൻട്രാഡേ അടിസ്ഥാനത്തിൽ 1,419 രൂപ വരെയാണ് വില ഉയർന്നത്. കമ്പനിയുടെ 2023 സെപ്തംബർ പാദഫലങ്ങൾ മികച്ചതായതിനെ തുടർന്നാണ് ഓഹരിവില വർധിച്ചത്. YoY അടിസ്ഥാനത്തിൽ അറ്റാദായം 100% വർധനയാണ് നേടിയത്.
അയൺ & സ്റ്റീൽ സെക്ടറിൽ ബിസിനസ് ചെയ്യുന്ന സ്മാൾക്യാപ് കമ്പനിയാണിത്. സ്റ്റെയിൻലെസ് സ്റ്റീൽ പൈപ്പ്സ് & ട്യൂബ്സ് നിർമാണം, കയറ്റുമതി തുടങ്ങിയ ബിസിനസുകൾ ചെയ്യുന്നു. കഴിഞ്ഞ ഒരു വർഷത്തിൽ മാത്രം 83.07% നേട്ടമാണ് ഈ ഓഹരി നൽകിയിരിക്കുന്നത്. 52 ആഴ്ച്ചകളിലെ ഉയർന്ന/താഴ്ന്ന നിലവാരങ്ങൾ യഥാക്രമം 1,578.90/644.55 രൂപ എന്നിങ്ങനെയാണ്. 2022 മെയിൽ ലിസ്റ്റ് ചെയ്ത കമ്പനിയാണിത്. അന്നുമുതൽ ഇതു വരെ ഏകദേശം 325 ശതമാനത്തിലധികം മൾട്ടിബാഗർ നേട്ടമാണ് ഈ ഓഹരി നൽകിയിരിക്കുന്നത്.
അടിസ്ഥാന വിവരങ്ങൾ (Fundamentals)
കമ്പനിയുടെ മാർക്കറ്റ് ക്യാപ് 2,832 കോടി രൂപയാണ്. ഇൻഡസ്ട്രി പി/ഇ 20, സ്റ്റോക്ക് പി/ഇ 45.4, ബുക്ക് വാല്യു 177 രൂപ, ഇപിഎസ് 30.7 രൂപ, പ്രൈസ് ടു ഏണിങ് 45.4, ആർഒസിഇ 22.9%, ആർഒഇ 19.6%, ഡിവിന്റ് യിൽഡ് 0.07%, ഫേസ് വാല്യു 10 രൂപ, ഡെറ്റ് റ്റു ഇക്വിറ്റി 0.41 എന്നിങ്ങനെയാണ്. കമ്പനിയുടെ 48.63% ഓഹരികൾ പ്രമോട്ടർ ഹോൾഡ് ചെയ്യുന്നു. വിദേശ നിക്ഷേപകർ 6.60% ഓഹരികളാണ് കൈവശം വെച്ചിരിക്കുന്നത്.
സെപ്തംബർ പാദഫലങ്ങൾ (Q2 Results)
മികച്ച രണ്ടാം പാദഫലങ്ങളാണ് കമ്പനി കഴിഞ്ഞ ദിവസം പ്രഖ്യാപിച്ചത്. 2023 ജൂണിലെ ഓപ്പറേറ്റിങ് പ്രൊഫിറ്റ് 28 കോടി രൂപയായിരുന്നത്, സെപ്തംബറിൽ 35 കോടി രൂപയായി ഉയർന്നു. ഇതേ കാലയളവിൽ അറ്റാദായം 17 കോടിയിൽ നിന്ന് 20 കോടി രൂപയായി വർധന നേടി.
വാർഷികാടിസ്ഥാനത്തിൽ, 2022 മാർച്ചിൽ 49 കോടി രൂപയായിരുന്ന ഓപ്പറേറ്റിങ് പ്രൊഫിറ്റ് 2023 മാർച്ചിൽ 69 കോടി രൂപയായി ഉയർന്നു. ഇതേ കാലയളവിൽ അറ്റാദായം 44 കോടി രൂപയിൽ നിന്ന് 62 കോടിയായി വർധിച്ചു.
2022 സെപ്തംബർ പാദത്തിൽ കമ്പനിയുടെ അറ്റാദായം 10 കോടി രൂപയായിരുന്നത് 2023 സെപ്തംബറിൽ 20 കോടി രൂപയായി 100% വർധനവാണ് നേടിയിരിക്കുന്നത്.
