കൊൽക്കത്ത:* പാവപ്പെട്ട വഴിയോരക്കച്ചവടക്കാരെ (ഹോക്കർമാരെ) പുനരധിവസിപ്പിക്കാതെ ഒഴിപ്പിക്കുന്ന സർക്കാരിന്റെ ക്രൂരമായ നടപടിക്കെതിരെ കൊൽക്കത്തയിൽ വൻ പ്രതിഷേധ പ്രകടനം. ബദൽ സംവിധാനങ്ങളോ കൃത്യമായ പുനരധിവാസമോ ഉറപ്പാക്കാതെ സാധാരണക്കാരുടെ ഉപജീവനമാർഗ്ഗം ഇല്ലാതാക്കുന്ന ബി.ജെ.പി സർക്കാരിന്റെ ജനവിരുദ്ധ നയങ്ങൾക്കെതിരെ ധർമ്മതലയിലെ ലെനിൻ സരണിയിൽ നിന്നും സുബോധ് മല്ലിക് സ്ക്വയർ വരെയാണ് വൻ പ്രതിഷേധ റാലി സംഘടിപ്പിച്ചത്. തൃണമൂൽ കോൺഗ്രസ് പ്രവർത്തകരും അനുഭാവികളും പൊതുജനങ്ങളും പ്രതിഷേധ മാർച്ചിൽ അണിനിരന്നു.
ഒഴിപ്പിക്കൽ നടപടികളുടെ പേരിൽ ആയിരക്കണക്കിന് സാധാരണക്കാരായ തൊഴിലാളികളുടെ വയറ്റത്തടിക്കുന്ന സമീപനമാണ് സർക്കാർ സ്വീകരിക്കുന്നതെന്ന് പ്രതിഷേധക്കാർ ആരോപിച്ചു. ഒരു കുടുംബത്തിന്റെ ഏക വരുമാനമാർഗ്ഗം ഇല്ലാതാക്കുന്നത് എന്ത് തരം വികസനമാണെന്ന് റാലിയിൽ പങ്കെടുത്തവർ ചോദ്യം ചെയ്തു. കൃത്യമായ പുനരധിവാസം ഉറപ്പാക്കാതെ വഴിയോരക്കച്ചവടക്കാരെ ഒഴിപ്പിക്കാൻ ഒരടിപോലും അനുവദിക്കില്ലെന്ന് നേതാക്കൾ വ്യക്തമാക്കി.
സംസ്ഥാനത്ത് അരാജകത്വമെന്ന് ആരോപണം
ബി.ജെ.പി ഭരണത്തിന് കീഴിൽ സാധാരണക്കാരുടെ ജീവിതം ദുസ്സഹമായി മാറിയിരിക്കുകയാണെന്ന് റാലിക്ക് നേതൃത്വം നൽകിയവർ വാർത്താക്കുറിപ്പിൽ അറിയിച്ചു. ഇതിന് പുറമേ, സംസ്ഥാനത്തുടനീളം വലിയ തോതിലുള്ള അരാജകത്വമാണ് നിലനിൽക്കുന്നത്. തൃണമൂൽ കോൺഗ്രസ് നേതാക്കളെയും പ്രവർത്തകരെയും ലക്ഷ്യമിട്ട് ആസൂത്രിതമായ അക്രമങ്ങളാണ് നടക്കുന്നത്.
ചൂഷിതരായ ജനവിഭാഗങ്ങൾക്കൊപ്പം ഉറച്ചുനിൽക്കുമെന്നും, ജനങ്ങളുടെ ജനാധിപത്യ അവകാശങ്ങൾ സംരക്ഷിക്കുന്നതിനായി ജനവിരുദ്ധ സർക്കാരിനെതിരെയുള്ള പോരാട്ടം ശക്തമായി തുടരുമെന്നും തൃണമൂൽ കോൺഗ്രസ് നേതൃത്വം വ്യക്തമാക്കി.
