വീഡിയോകളിൽ സോഷ്യൽ മീഡിയ പ്ലാറ്റ്ഫോമുകൾക്ക് വീണ്ടും കേന്ദ്ര ഐടി മന്ത്രാലയത്തിന്റെ മുന്നറിയിപ്പ്.ഡീപ്ഫേക്കുകളിൽ ആശങ്ക പ്രകടിപ്പിച്ച കേന്ദ്രം നിലവിലുള്ള ഐടി നിയമങ്ങൾ കർശനമായി പാലിക്കാനും നിർദ്ദേശം നൽകി. ഐടി നിയമങ്ങൾക്ക് കീഴിൽ വ്യക്തമാക്കിയിരിക്കുന്ന നിരോധിത ഉള്ളടക്കത്തെക്കുറിച്ച് ഉപയോക്താക്കളെ അറിയിക്കാൻ സോഷ്യൽ മീഡിയ പ്ലാറ്റ്ഫോമുകൾ നിർബന്ധിതമാണെന്നും നിർദ്ദേശത്തിൽ പറയുന്നു. ഐടി നിയമങ്ങളിലെ റൂൾ 3(1)(ബി) പ്രകാരം ശരീര സ്വകാര്യതയും അശ്ലീല ഉള്ളടക്കവും ഉൾപ്പെടെ മറ്റുള്ളവരുടെ അവകാശങ്ങളെ ലംഘിക്കുന്ന ഉള്ളടക്കം പങ്കിടുന്നതിൽ വിലക്ക് ഏർപ്പെടുത്തിയിരിക്കുന്നു.
പ്ലാറ്റ്ഫോം ഉപയോഗിക്കുന്നതിന് രജിസ്ട്രേഷൻ സമയത്ത് തന്നെ അത്തരം നിരോധിത ഉള്ളടക്കത്തെക്കുറിച്ച് ഉപയോക്താവിനെ അറിയിക്കണം. ഉപയോക്താക്കൾ പ്ലാറ്റ്ഫോമിൽ ലോഗിൻ ചെയ്യുമ്പോഴോ അതിൽ വിവരങ്ങൾ അപ്ലോഡ് ചെയ്യുകയോ പങ്കിടുകയോ ചെയ്യുമ്പോഴെല്ലാം അവർക്ക് പതിവായി സന്ദേശങ്ങൾ അയയ്ക്കേണ്ടതുണ്ടെന്ന് മന്ത്രാലയം അറിയിച്ചു. കൂടാതെ, ഐടി നിയമങ്ങൾ ലംഘിക്കുന്നതിന്റെ നിയമപരമായ പ്രത്യാഘാതങ്ങളെക്കുറിച്ച് ഉപയോക്താക്കളെ അറിയിക്കാനും സോഷ്യൽ മീഡിയ പ്ലാറ്റ്ഫോമുകൾക്ക് നിർദ്ദേശം നൽകിയിട്ടുണ്ട്.
കേന്ദ്ര ഇലക്ട്രോണിക്സ് ആന്റ് ഐടി മന്ത്രി രാജീവ് ചന്ദ്രശേഖർ സമൂഹ മാധ്യമങ്ങളുമായി ഒരു മാസത്തിനിടെ നടത്തിയ ചർച്ചകൾക്ക് ശേഷമാണ് നിർദ്ദേശം പുറപ്പെടുവിച്ചത്. ഡീപ്ഫേക്കുകളുടെ പ്രധാന പ്രശ്നം പരിഹരിക്കുന്നതിനായി അദ്ദേഹം വ്യവസായ പ്രമുഖരുമായി ചർച്ചകൾ നടത്തുകയും എല്ലാ പ്ലാറ്റ്ഫോമുകളും നിലവിലെ നിയമങ്ങളും ചട്ടങ്ങളും പാലിക്കേണ്ടതിന്റെ അടിയന്തിരത എടുത്തുപറയുകയും ചെയ്തു. ഡീപ് ഫേക്കുകൾ രാജ്യം നേരിടുന്ന ഏറ്റവും വലിയ ഭീഷണിയാണെന്ന് നേരത്തെ പ്രധാനമന്ത്രിയും പറഞ്ഞിരുന്നു. ഇത് സമൂഹത്തിൽ അരാജകത്വം സൃഷ്ടിക്കുമെന്ന് പറഞ്ഞ അദ്ദേഹം, ഡീപ് ഫേക്കുകൾക്കെതിരെ മാധ്യമങ്ങൾ ജനങ്ങളെ ബോധവത്കരിക്കണമെന്നും ആവശ്യപ്പെട്ടു.
നവംബറിൽ പ്രധാനമന്ത്രി നരേന്ദ്ര മോദി ഡീപ്ഫേക്കുകളിൽ ആശങ്ക ഉയർത്തിയതുമുതൽ, അത്തരം ഉള്ളടക്കങ്ങൾ അവരുടെ പ്ലാറ്റ്ഫോമുകളിൽ നിന്ന് ഉടനടി നീക്കം ചെയ്യുന്നതിൽ ജാഗ്രത പാലിക്കാൻ സോഷ്യൽ മീഡിയ പ്ലാറ്റ്ഫോമുകളോട് ആവശ്യപ്പെട്ടിട്ടുണ്ടെന്നും രാജീവ് ചന്ദ്രശേഖർ പറഞ്ഞു. ഐടി നിയമങ്ങൾക്ക് കീഴിലുള്ള ലംഘനങ്ങളുമായി ബന്ധപ്പെട്ട നിയമപരമായ പ്രത്യാഘാതങ്ങളെക്കുറിച്ച് പ്ലാറ്റ്ഫോമുകളെ കൃത്യമായി അറിയിച്ചിട്ടുണ്ടെന്നും അദ്ദേഹം കൂട്ടിച്ചേർത്തു.
നിർമ്മിത ബുദ്ധി ഉപയോഗിച്ച് കൃത്രിമമായി നിർമിക്കുന്ന, യഥാർഥമെന്ന് തോന്നുന്ന ചിത്രങ്ങൾ, വീഡിയോകൾ, ശബ്ദം ഉൾപ്പെടെയുള്ള ഉള്ളടക്കങ്ങൾ തുടങ്ങിയവയെയാണ് ഡീപ്പ് ഫേക്കുകൾ എന്ന് വിളിക്കുന്നത്. നടി രശ്മിക മന്ദാനയുടെ ഡീപ് ഫേക്ക് വീഡിയോ ചർച്ചയായിരുന്നു. ഇതിന് പിന്നാലെ കത്രീന കൈഫ്, കജോൾ എന്നിവരുടേയും ഡീപ് ഫേക്ക് വീഡിയോകൾ പ്രചരിക്കപ്പെട്ടിരുന്നു.
