പടർന്നുപിടിച്ച് പകർച്ചവ്യാധികൾ; കാലവർഷത്തിന് പിന്നാലെ രോഗക്കിടക്കയിലായി കേരളം; ആശങ്കയായി അമീബിക് മസ്തിഷ്കജ്വരവും ഷിഗല്ലയും

തിരുവനന്തപുരം: കാലവർഷത്തിന്റെ വരവിന് പിന്നാലെ പകർച്ചവ്യാധികൾ കൂടി പിടിമുറുക്കിയതോടെ കേരളം കനത്ത ആരോഗ്യ പ്രതിസന്ധിയിലേക്ക്. ഒരു ഭാഗത്ത് ഷിഗല്ലയും നിപയും പൊതുജനാരോഗ്യത്തിന് വലിയ വെല്ലുവിളി ഉയർത്തുമ്പോൾ, മറുഭാഗത്ത് പനിബാധിതരുടെ എണ്ണം പ്രതിദിനം കുതിച്ചുയരുകയാണ്. ജൂണിലെ ആദ്യ 16 ദിവസത്തെ കണക്കുകൾ മാത്രം പരിശോധിച്ചാൽ 1,67,222 പേരാണ് പനിക്ക് ചികിത്സ തേടിയത്. ഇതിൽ ഒരു മരണവും റിപ്പോർട്ട് ചെയ്തു. ഈ വർഷം ഇതുവരെ സംസ്ഥാനത്ത് ആകെ 10,40,798 പേർക്കാണ് പനി ബാധിച്ചത്.

ലക്ഷണങ്ങളും തീവ്രതയും

മൂന്നോ നാലോ ദിവസം നീളുന്ന പനിയും കടുത്ത ക്ഷീണവുമാണ് നിലവിൽ പടരുന്ന പനിയുടെ പ്രധാന ലക്ഷണം.

ജലദോഷം, പനി, ചെവിവേദന, മൂക്കൊലിപ്പ്, ചുമ, തൊണ്ടവേദന തുടങ്ങിയ പതിവ് ലക്ഷണങ്ങളാണ് ഭൂരിഭാഗം പേരിലും കാണുന്നത്.
അപൂർവം ചിലർക്ക് ചുമയും ശ്വാസംമുട്ടലുമടക്കമാണ് പനി പിടിപെടുന്നത്.
ചിലരിൽ പനി മാറിയാലും കടുത്ത ക്ഷീണം അവശേഷിക്കുന്നുണ്ട്. പനി മാറി ഒരാഴ്ചയുടെ ഇടവേളയിൽ വീണ്ടും രോഗബാധയുണ്ടാകുന്ന സ്ഥിതിയുമുണ്ട്.

ഡെങ്കിപ്പനി ഭീഷണിയിൽ സംസ്ഥാനം

സംസ്ഥാനത്ത് ഡെങ്കിപ്പനി കേസുകളും വൻതോതിൽ ഉയരുകയാണ്. ജൂണിൽ മാത്രം 924 പേർക്ക് ഡെങ്കിപ്പനി സ്ഥിരീകരിച്ചു. മൂന്ന് മരണങ്ങൾ റിപ്പോർട്ട് ചെയ്തപ്പോൾ, മറ്റ് അഞ്ച് മരണങ്ങൾ ഡെങ്കിപ്പനി മൂലമാണോ എന്ന് സംശയിക്കുന്നു. ഈ വർഷം സംസ്ഥാനത്ത് റിപ്പോർട്ട് ചെയ്ത ആകെ ഡെങ്കി കേസുകളിൽ 27.24 ശതമാനവും ജൂണിലെ ഈ 16 ദിവസങ്ങളിലാണ് രേഖപ്പെടുത്തിയത് എന്നത് സ്ഥിതിഗതികളുടെ ഗൗരവം വർദ്ധിപ്പിക്കുന്നു. ഡെങ്കി വൈറസിന്റെ നാല് വ്യത്യസ്ത വകഭേദങ്ങൾ സംസ്ഥാനത്ത് ഒന്നുപോലെ നിലനിൽക്കുന്നതിനാൽ, ഓരോ മൂന്നോ നാലോ വർഷം കൂടുമ്പോഴും രോഗബാധയുടെ തീവ്രത വർദ്ധിക്കുന്ന രീതി കേരളത്തിൽ കാണപ്പെടുന്നുണ്ട്.

തീവ്രവ്യാപനവുമായി ഷിഗല്ല

ജനുവരി മുതൽ ജൂൺ വരെയുള്ള 167 ദിവസങ്ങളിൽ ആകെ 146 ഷിഗല്ല കേസുകളാണ് റിപ്പോർട്ട് ചെയ്തതെങ്കിൽ, ഇതിൽ 70 കേസുകളും അവസാനത്തെ 16 ദിനങ്ങളിലാണ് സ്ഥിരീകരിച്ചത്. ഇത് രോഗത്തിന്റെ തീവ്രവ്യാപന സൂചനയാണ് നൽകുന്നത്. ഈ വർഷത്തെ ആകെ അഞ്ച് മരണങ്ങളും റിപ്പോർട്ട് ചെയ്തത് ജൂണിലാണ്.

ശ്രദ്ധിക്കുക: ഷിഗല്ല ബാക്ടീരിയ മൂലമുണ്ടാകുന്ന അതിസാരം അതീവ സമ്പർക്ക സ്വഭാവമുള്ള ഒരു ജലജന്യ രോഗമാണ്. വളരെ വേഗത്തിൽ പകരുന്ന ഈ രോഗബാധ പൊതുജനാരോഗ്യത്തിന് വലിയ വെല്ലുവിളിയാകുമെന്ന് തിരിച്ചറിഞ്ഞ്, വിപുലമായ പ്രതിരോധ ദൗത്യത്തിന് സർക്കാർ തുടക്കമിട്ടിട്ടുണ്ട്.

അമീബിക് മസ്തിഷ്കജ്വരം: ആശങ്കപ്പെടുത്തുന്ന കണക്കുകൾ
സംസ്ഥാനത്ത് സമീപകാലത്തുണ്ടായ അമീബിക് മസ്തിഷ്കജ്വര കേസുകളിലെ വർദ്ധനവ് ചെറുതല്ലാത്ത ആശങ്കയാണ് ഉയർത്തുന്നത്. മുൻവർഷങ്ങളെ അപേക്ഷിച്ച് രോഗബാധിതരുടെ എണ്ണത്തിൽ വൻ വർദ്ധനവാണ് രേഖപ്പെടുത്തുന്നത്:

വർഷം | രോഗബാധിതരുടെ എണ്ണം