നീണ്ടുനിന്ന അനിശ്ചിതത്വത്തിനൊടുവിൽ മോഹൻലാൽ മാധ്യമങ്ങൾക്ക് മുൻപിൽ എത്തി. എന്നാൽ തീർത്തും നിസ്സഹായനായാണ് അദ്ദേഹത്തിൻ്റെ വാക്കുകൾ. താൻ ഒരിടത്തേക്കും ഒളിച്ചോടി പോയതല്ലെന്നും തങ്ങളെ വല്ലാതെ ആക്രമിക്കാനാണ് ശ്രമിക്കുന്നതെന്നും പറയുന്നു. ആദ്യം തന്നെ താൻ മാധ്യമങ്ങൾക്ക് മുൻപിൽ എത്താൻ വൈകിയതിൻ്റെ കാര്യം പറഞ്ഞാണ് അദ്ദേഹം വാക്കുകൾ ആരംഭിച്ചത്.
വ്യക്തിപരമായ കാരണങ്ങളാൽ കേരളത്തിലുണ്ടായിരുന്നില്ല. ഭാര്യയുടെ ശസ്ത്രക്രിയയും ബറോസിൻ്റെ പ്രവർത്തനങ്ങളുമായി തിരക്കിലായിരുന്നുവെന്നും അതിനാലാണ് പ്രതികരണം വൈകിയതെന്നും പറഞ്ഞ അദ്ദേഹം സിനിമകളുടെ റിലീസ് മാറ്റിവച്ചുവെന്നും അറിയിച്ചു.
മലയാള സിനിമയിലുണ്ടായ വിവാദങ്ങളെക്കുറിച്ച് ചോദിച്ചപ്പോൾ സിനിമ സമൂഹത്തിൻ്റെ ഭാഗമാണെന്നും സംഭവിക്കുന്ന കാര്യങ്ങൾ ഇവിടെയും സംഭവിക്കുന്നുമായിരുന്നു അദ്ദേഹത്തിൻ്റെ മറുപടി. അമ്മ ട്രേഡ് യൂണിയനല്ല, അത് അംഗങ്ങളുടെ ക്ഷേമത്തിന് വേണ്ടി തുടങ്ങിയ സംഘടനയാണ്. ഹേമ കമ്മിറ്റി റിപ്പോർട്ടുമായി ബന്ധപ്പെട്ട് മറുപടി പറയേണ്ടത് സിനിമാ രംഗം ആകെയാണ്. എന്തിനും ഏതിനും കുറ്റപ്പെടുത്തുന്നത് അമ്മയെയാണ്. ഏറ്റവും കൂടുതൽ ശരങ്ങൾ വരുന്നതും തനിക്കും അമ്മയ്ക്കും നേരെയാണ്. ഈ സാഹചര്യത്തിൽ അഭിഭാഷകരോട് അടക്കം സംസാരിച്ചാണ് അമ്മയുടെ ചുമതലകളിൽ നിന്ന് രാജിവെച്ചതെന്നും മോഹൻലാൽ പറഞ്ഞു.
ഒരുപാട് വിഷമം തോന്നുന്നുണ്ട്. ഇപ്പോൾ ഇയരുന്ന വിഷയങ്ങൾ ഇൻ്റസ്ട്രിയെ തന്നെ തകർക്കുന്നതാണ്. അമ്മയുടെ പ്രസിഡൻ്റ് എന്ന നിലയിലല്ല, എൻ്റെ വ്യക്തിപരമായ അഭിപ്രായങ്ങളാണ് ഇവിടെ പങ്കുവെയ്ക്കുന്നത്. സിനിമ വ്യവസായം തകരാൻ പോവുന്ന സ്ഥിതിയാണ്. താൻ അഭിനയത്തിലേക്ക് വന്നപ്പോൾ ഒരു സൗകര്യവും ഉണ്ടായില്ല. ഒരുപാട് നല്ല താരങ്ങളുള്ള വ്യവസായ രംഗമാണ്. മലയാള സിനിമയിലേക്ക് ഫോക്കസ് ചെയ്ത് ഈ മേഖലയെ ആകെ തകർക്കരുത്. സർക്കാരും പൊലീസും കുറ്റക്കാർക്കെതിരെയുണ്ട്. കോടതി വരെ എത്തി നിൽക്കുന്ന വിഷയമാണ് ഇത്. പതിനായിരക്കണക്കിന് പേർ ജോലി ചെയ്യുന്ന വ്യവസായ രംഗമാണിതെന്നും അദ്ദേഹം പറഞ്ഞു. അതുകൊണ്ടുതന്നെ എല്ലാ ചോദ്യങ്ങൾക്കും അമ്മ മാത്രം മറുപടി പറയട്ടേ എന്ന് പറയുന്നതും ശരിയല്ല.
അങ്ങേയറ്റം ഖേദകരമായ സംഭവങ്ങളാണ് ഇവിടെ നടന്നത്. എന്നാൽ ഇതിൻ്റെ ഉത്തരവാദിത്തം അമ്മ എന്ന സംഘടനയ്ക്ക് മാത്രമല്ല, മലയാള സിനിമയ്ക്കാകെയാണ്. പക്ഷേ എല്ലാവരും കുറ്റപ്പെടുത്താൻ ശ്രമിക്കുന്നത് അമ്മയെ മാത്രമാണ്. ഒട്ടേറെ ആളുകൾക്ക് താങ്ങായി നിൽക്കുന്ന ഒരു സംഘടനയാണ് അമ്മ. എന്നാൽ അക്കാര്യങ്ങൾ പോലും നിർവ്വഹിക്കാൻ സാധിക്കാത്ത വിധമാണ് ഇപ്പോഴത്തെ സാഹചര്യം.
അമ്മയുടെ ഭാഗമായി ഞങ്ങൾ എടുത്ത തീരുമാനത്തെ പലരും തെറ്റിയിപ്പോയെന്നും അങ്ങനെയല്ല ചെയ്യേണ്ടിയിരുന്നതെന്നും പറയുന്നത് കേട്ടു. അവർ സംഘടനയുടെ നേതൃസ്ഥാനത്തേയ്ക്ക് വരണമെന്നാണ് തനിക്ക് പറയാനുള്ളതെന്നും അദ്ദേഹം പറഞ്ഞു. താനും ഹേമ കമ്മിറ്റിക്ക് മുൻപിൽ ഹാജരായ ആളാണ്, ഇനിയുള്ള കാര്യങ്ങൾ ചെയ്യേണ്ടത് സർക്കാരാണെന്നും പറഞ്ഞ് വളരെ പെട്ടെന്ന് തന്നെ ചോദ്യോത്തര വേള അവസാനിപ്പിക്കുകയായിരുന്നു അദ്ദേഹം.
