കേരളത്തിൽ നിപ വൈറസ് ബാധിച്ച് 14 വയസ്സുകാരൻ മരിച്ചതിന് പിന്നാലെ ചടുല നീക്കവുമായി കേന്ദ്രസർക്കാർ. സംഭവം അന്വേഷിക്കുന്നതിനും പകർച്ചവ്യാധി തടയുന്നതിനും സാങ്കേതിക സഹായം നൽകുന്നതിനും കേന്ദ്രസർക്കാർ ഒരു സംഘത്തെ നിയോഗിക്കാൻ തീരുമാനിച്ചു
ആരോഗ്യ മന്ത്രാലയം പറഞ്ഞത്
അക്യൂട്ട് എൻസെഫലൈറ്റിസ് സിൻഡ്രോം ബാധിച്ച 14 വയസ്സുകാരനെ പെരിന്തൽമണ്ണയിലെ ആശുപത്രിയിൽ പ്രവേശിപ്പിക്കുകയും കോഴിക്കോട്ടെ ആശുപത്രിയിലേക്ക് മാറ്റുകയും ചെയ്തിരുന്നു. പൂനെ നാഷണൽ ഇൻസ്റ്റിറ്റ്യൂട്ട് ഓഫ് വൈറോളജിയിലേക്ക് അയച്ച സാമ്പിളിലാണ് നിപാ വൈറസ് ബാധ സ്ഥിരീകരിച്ചതെന്നും കേന്ദ്ര ആരോഗ്യ മന്ത്രാലയം പ്രസ്താവനയിൽ പറഞ്ഞു.
കേരളത്തിൽ നേരത്തെയും നിപ വൈറസ് ബാധ റിപ്പോർട്ട് ചെയ്തിട്ടുണ്ട്. 2023ൽ കോഴിക്കോട് ജില്ലയിലാണ് അവസാനമായി രോഗബാധ സ്ഥിരീകരിച്ചത്. പൊതുജനാരോഗ്യ നടപടികൾ ഉടനടി നടപ്പാക്കാൻ ആരോഗ്യ മന്ത്രാലയം സംസ്ഥാനത്തിന് നിർദ്ദേശം നൽകി. മരണപ്പെട്ടവരുമായി സമ്പർക്കം പുലർത്തിയ ആളുകളെ തിരിച്ചറിയാനും അയൽപക്കത്തുള്ളവരെ പരിശോധിക്കാനും കഴിഞ്ഞ 12 ദിവസത്തിനുള്ളിൽ രോഗിയുമായി സമ്പർക്കം പുലർത്തിയ ആളുകളെ കണ്ടെത്താനും സംസ്ഥാന സർക്കാരിന് നിർദ്ദേശം നൽകിയിട്ടുണ്ട്. അവരെ കർശനമായ ക്വാറൻ്റൈനിൽ സൂക്ഷിക്കാനാണ് നിർദ്ദേശം.
അന്വേഷണത്തിനായി കേന്ദ്രസംഘം
കേസ് അന്വേഷിക്കുന്നതിനും എപ്പിഡെമിയോളജിക്കൽ ലിങ്കുകൾ തിരിച്ചറിയുന്നതിനും സാങ്കേതിക സഹായം നൽകുന്നതിനും സംസ്ഥാനത്തെ പിന്തുണയ്ക്കുന്നതിനായി ആരോഗ്യ മന്ത്രാലയത്തിൻ്റെ ‘ഒരു ആരോഗ്യം’ ദൗത്യത്തിന് കീഴിലുള്ള ഒരു പ്രതികരണ സംഘത്തെ വിന്യസിക്കുമെന്നാണ് അറിയിപ്പ്.
എന്താണ് നിപാ വൈറസ്?
റിപ്പോർട്ടുകൾ പ്രകാരം 1998-99 ലാണ് ആദ്യമായി നിപ്പ ബാധ റിപ്പോർട്ട് ചെയ്തത്. മലേഷ്യയിലെ കാംപുങ് സുംഗൈ നിപ എന്ന സ്ഥലത്താണ് ഇത് ആദ്യമായി കണ്ടെത്തിയത്. ഇതാണ് ഈ പേരിടാൻ കാരണം. ഇവിടെ 250-ലധികം ആളുകൾക്ക് ഈ അണുബാധ ബാധിച്ചു. വവ്വാലുകൾ മലിനമാക്കിയ പഴങ്ങളിലൂടെയോ മറ്റ് ഭക്ഷണങ്ങളിലൂടെയോ ഇത് മനുഷ്യരിലേക്ക് പടരുന്നു. പഴങ്ങളും പച്ചക്കറികളും കഴിക്കുന്നതിന് മുമ്പ് നന്നായി വൃത്തിയാക്കണമെന്ന് ആരോഗ്യ വിദഗ്ധർ പറയുന്നു.
