അരവിന്ദ് കെജ്രിവാളിനെ കൊല്ലാൻ ഗൂഢാലോചന നടക്കുന്നുണ്ടെന്ന് ആം ആദ്മി പാർട്ടി രാജ്യസഭാ എംപി സഞ്ജയ് സിംഗ്. നിലവിൽ തിഹാർ ജയിലിൽ കഴിയുന്ന കെജ്രിവാളിൻ്റെ ആരോഗ്യം വഷളാക്കാനാണ് ബിജെപി ശ്രമിക്കുന്നതെന്നും എംപി ആരോപിച്ചു. എപ്പോൾ വേണമെങ്കിലും എന്തും സംഭവിക്കാമെന്നാണ് കെജ്രിവാളിൻ്റെ മെഡിക്കൽ റിപ്പോർട്ടുകൾ വ്യക്തമാക്കുന്നതെന്ന് സഞ്ജയ് സിംഗ് അവകാശപ്പെട്ടു.
ബിജെപി കെജ്രിവാളിൻ്റെ ആരോഗ്യം മോശമാക്കുകയാണ്. ആദ്യം അദ്ദേഹം മധുരപലഹാരങ്ങൾ കഴിക്കുകയും പഞ്ചസാരയുടെ അളവ് കൂട്ടാൻ ശ്രമിക്കുകയും ചെയ്യുന്നുവെന്നാണ് അവർ പറഞ്ഞിരുന്നത്, എന്നാൽ ഇപ്പോൾ അദ്ദേഹം ഭക്ഷണം കഴിക്കുന്നത് കുറച്ചുവെന്ന് അവർ പറയുന്നു. ആരെങ്കിലും ഇത് ചെയ്ത് സ്വന്തം ജീവിതത്തിന് ഭീഷണി ഉയർത്തുമോ..?” സിംഗ് ചോദിച്ചു.
കെജ്രിവാൾ മനഃപൂർവം രോഗബാധിതനാകുകയാണെന്ന ഡൽഹി ലെഫ്റ്റനൻ്റ് ഗവർണർ വി കെ സക്സേനയുടെ സമീപകാല പരാമർശത്തെയും എഎപി എംപി വിമർശിച്ചു. തങ്ങളുടെ നേതാവിനെ കൊല്ലാനുള്ള ദുഷിച്ച പദ്ധതിയാണ് ബിജെപി ആസൂത്രണം ചെയ്യുന്നതെന്നും എഎപി ആരോപിച്ചു.
ജുഡീഷ്യൽ കസ്റ്റഡിയിൽ തിഹാർ ജയിലിൽ കഴിയുമ്പോൾ കെജ്രിവാൾ നിർദ്ദേശിച്ച മെഡിക്കൽ ഭക്ഷണവും മരുന്നുകളും കഴിക്കാത്തതിൽ ആശങ്ക പ്രകടിപ്പിച്ച് ലഫ്റ്റനൻ്റ് ഗവർണറുടെ ഓഫീസ് വെള്ളിയാഴ്ച ചീഫ് സെക്രട്ടറിക്ക് കത്തയച്ചിരുന്നു. ഇതിന് പിന്നിലെ കാരണങ്ങൾ അന്വേഷിക്കാൻ സക്സേന ഉദ്യോഗസ്ഥരോട് ആവശ്യപ്പെടുകയും ചെയ്തിരുന്നു.
കെജ്രിവാളിൻ്റെ ആരോഗ്യനിലയെക്കുറിച്ചുള്ള തിഹാർ ജയിൽ സൂപ്രണ്ടിൻ്റെ (ജയിൽ) റിപ്പോർട്ട് പുറത്തുവന്നിരുന്നു. ആവശ്യത്തിന് വീട്ടിൽ പാകം ചെയ്ത ഭക്ഷണം നൽകിയിട്ടും മുഖ്യമന്ത്രി മനഃപൂർവം കുറഞ്ഞ കലോറി കഴിക്കുന്ന സംഭവങ്ങൾ എടുത്തുകാണിക്കുന്നതായിരുന്നു റിപ്പോർട്ട്. ജൂലൈ ഏഴിന് അത്താഴത്തിന് മുമ്പ് ഇൻസുലിൻ എടുക്കാൻ കെജ്രിവാൾ വിസമ്മതിച്ചതായും റിപ്പോർട്ടിൽ പറയുന്നു.
