ഒത്തുകളിക്കാതെ ബിജെപിയുടെ ‘400 പർ’ മുദ്രാവാക്യം സാധ്യമല്ലെന്ന് കോൺഗ്രസ് എംപി രാഹുൽ ഗാന്ധി. 400 ലേക്കെത്താനാണ് പ്രധാനമന്ത്രി സ്വന്തം അമ്പയർമാരെ തിരഞ്ഞെടുത്തതെന്നും അദ്ദേഹം കൂട്ടിച്ചേർത്തു. ഞായറാഴ്ച നടന്ന റാലിയെ അഭിസംബോധന ചെയ്ത രാഹുൽ ബിജെപിക്കെതിരെ രൂക്ഷമായ ആക്രമണം നടത്തി. റാലിയിൽ മറ്റു പ്രതിപക്ഷ നേതാക്കളും അണിനിരന്നു.
കള്ളപ്പണം വെളുപ്പിക്കൽ കേസിൽ ഡൽഹി മുഖ്യമന്ത്രി അരവിന്ദ് കേജ്രിവാളിനെ എൻഫോഴ്സ്മെൻ്റ് ഡയറക്ടറേറ്റ് മാർച്ച് 21 ന് അറസ്റ്റ് ചെയ്തതിനെതിരെ പ്രതിപക്ഷ ഇന്ത്യാ സഖ്യത്തിൻ്റെ ഉന്നത നേതാക്കൾ ഡൽഹി ഡൽഹി രാംലീല മൈതാനിയിൽ ആഹ്വാനം ചെയ്ത ‘ലോക്തന്ത്ര ബച്ചാവോ’ റാലിയിൽ സംസാരിക്കവെയാണ് രാഹുൽ ഇക്കാര്യം പറഞ്ഞത്.
ഇവിഎമ്മുകൾ, ഒത്തുകളി, സോഷ്യൽ മീഡിയ, മാധ്യമങ്ങളെ സമ്മർദ്ദത്തിലാക്കൽ എന്നിവയില്ലാതെ അവർക്ക് (ബിജെപി) 180 സീറ്റുകളിൽ കൂടുതൽ വിജയിക്കാനാവില്ലെന്ന് രാഹുൽ പരിഹസിച്ചു.
“ഇന്ന് ഐപിഎൽ മത്സരങ്ങൾ നടക്കുന്നു. അമ്പയർമാരെ സമ്മർദത്തിലാക്കുകയും കളിക്കാരെ വാങ്ങുകയും ക്യാപ്റ്റൻമാരെ മത്സരങ്ങൾ ജയിപ്പിക്കാൻ ഭീഷണിപ്പെടുത്തുകയും ചെയ്യുമ്പോൾ അതിനെ ക്രിക്കറ്റിൽ ഒത്തുകളി എന്ന് വിളിക്കുന്നു. നമുക്ക് മുന്നിൽ ലോക്സഭാ തിരഞ്ഞെടുപ്പുണ്ട്. അതിന് അമ്പയർമാരെ തിരഞ്ഞെടുത്തത് പ്രധാനമന്ത്രി മോദിയാണ്. ഞങ്ങളുടെ ടീമിലെ രണ്ട് കളിക്കാരെ മത്സരത്തിന് മുമ്പ് അറസ്റ്റ് ചെയ്തു,” രാഹുൽ ഗാന്ധി പറഞ്ഞു
“കോൺഗ്രസ് ഏറ്റവും വലിയ പ്രതിപക്ഷ പാർട്ടിയാണ്, ഞങ്ങളുടെ എല്ലാ ബാങ്ക് അക്കൗണ്ടുകളും തിരഞ്ഞെടുപ്പിൻ്റെ മധ്യത്തിൽ അടച്ചുപൂട്ടി. നമുക്ക് പ്രചാരണങ്ങൾ നടത്തണം, സംസ്ഥാനങ്ങളിലേക്ക് പ്രവർത്തകരെ അയക്കണം, പോസ്റ്ററുകൾ പതിക്കണം, പക്ഷേ ഞങ്ങളുടെ എല്ലാ ബാങ്ക് അക്കൗണ്ടുകളും പൂട്ടിയിരിക്കുന്നു. എങ്ങനെ തിരഞ്ഞെടുപ്പിനെ നേരിടും? രാഹുൽ ചോദ്യം ചെയ്തു.
പാവപ്പെട്ടവരിൽ നിന്ന് ഭരണഘടന തട്ടിയെടുക്കാൻ പ്രധാനമന്ത്രിയും 3,4 മുതലാളിമാരും ചേർന്ന് ഒത്തുകളി നടത്തുകയാണെന്നും രാഹുൽ ഗാന്ധി പറഞ്ഞു
“ഇത് സാധാരണ തിരഞ്ഞെടുപ്പല്ല, രാജ്യത്തെയും ഭരണഘടനയെയും രക്ഷിക്കാനാണ്. നിങ്ങൾ പൂർണ ശക്തിയോടെ വോട്ട് ചെയ്തില്ലെങ്കിൽ അവരുടെ ഒത്തുകളി വിജയിക്കും. അത് വിജയിച്ചാൽ ഭരണഘടന തകരും. ഭരണഘടനയാണ് ജനങ്ങളുടെ ശബ്ദം. അത് തീരുന്ന ദിവസം രാജ്യം അവസാനിക്കും. 400 സീറ്റുകൾ ലഭിക്കുമ്പോൾ ഭരണഘടന മാറ്റുമെന്ന് ഒരു ബിജെപി എംപി പറഞ്ഞിരുന്നു. ഒരു ആശയം പരീക്ഷിക്കാനാണ് ഇത് പറഞ്ഞതെന്നും അദ്ദേഹം കൂട്ടിച്ചേർത്തു.
