നരേന്ദ്ര മോദി 3.O യിൽ കേന്ദ്രമന്ത്രിയായി ചുമതലയേറ്റ് ജോർജ് കുര്യൻ. ഇതോടെ കേരളത്തിൽ നിന്നുള്ള കേന്ദ്ര സഹമന്ത്രിമാരുടെ എണ്ണം രണ്ടായി. കേരളത്തെ സംബന്ധിച്ചിടത്തോളം വലിയ സർപ്രൈസ് തന്നെയായിരുന്നു ഇത്. കോട്ടയം സ്വദേശിയായ ജോര്ജ് കുര്യന് യുവമോര്ച്ചയിലൂടെയാണ് രാഷ്ട്രീയപ്രവര്ത്തനം ആരംഭിച്ചത്. ബിജെപിയുടെ ന്യൂനപക്ഷമുഖമായാണ് അദ്ദേഹം ശ്രദ്ധനേടുന്നത്. പാര്ട്ടി ദേശീയ സെക്രട്ടറി കൂടിയായ ജോര്ജ് കുര്യന് ദേശീയ ന്യൂനപക്ഷ കമ്മീഷന് ഉപാധ്യക്ഷനായിരുന്നു.
ഒ രാജഗോപാൽ കേന്ദ്രമന്ത്രിയായിരുന്ന കാലഘട്ടത്തിൽ ഒഎസ്ഡി (ഓൺ സ്പെഷ്യൽ ഡെപ്യൂട്ടേഷൻ)യായും അദ്ദേഹം പ്രവർത്തിച്ചിരുന്നു. നേരത്തെ ബിജെപി സംസ്ഥാന ഉപാധ്യക്ഷന്റെ പദവിയും അലങ്കരിച്ചിരുന്നു. പുതുപ്പളളിയിൽ ഉമ്മൻചാണ്ടിക്കെതിരെ ബിജെപി സ്ഥാനാർത്ഥിയായിരുന്നു. യുവമോർച്ച മുതൽ രാഷ്ട്രീയ പ്രവർത്തനമാരംഭിച്ച അദ്ദേഹം ചാനൽ ചർച്ചകളിലൂടെയും മലയാളികൾക്ക് സുപരിചിതനാണ്.
ഇന്ന് രാവിലെ ക്ഷണിക്കപ്പെട്ട എൻഡിഎ നേതാക്കളുടെ യോഗം നരേന്ദ്രമോദിയുടെ വസതിയിൽ സംഘടിപ്പിച്ചിരുന്നു. ഈ ചായസൽക്കാരത്തിൽ കുര്യനും പങ്കെടുത്തു. നാലര പതിറ്റാണ്ടോളമായി ബിജെപിയ്ക്കൊപ്പമുള്ള യാത്രയ്ക്കുള്ള ആംഗീകാരമായാണ് അദ്ദേഹത്തിൻ്റെ കുടുംബം ഈ മന്ത്രിസ്ഥാനത്തെ കാണുന്നത്. എല്ലാക്കാലത്തും അദ്ദേഹത്തെ പിന്തുണയ്ക്കുക എന്നതാണ് തങ്ങൾ ചെയ്തിട്ടുള്ളതെന്നും കുടുംബം പങ്കുവെയ്ക്കുന്നു.
