പഞ്ചാബ്-ഹരിയാന അതിർത്തിയിലെ പ്രതിഷേധത്തിനിടയിൽ കർഷകൻ മരണപ്പെട്ട സംഭവത്തിൽ കൊലപാതകത്തിന് കേസെടുക്കണമെന്ന് ഐക്യ കർഷക മോർച്ച ആവശ്യപ്പെട്ടു. സംഭവത്തെ അപലപിച്ച് ഫെബ്രുവരി 23 വെള്ളിയാഴ്ച കറുത്ത ദിനമായി ആചരിക്കുവാൻ സംയുക്ത കർഷക മോർച്ച തീരുമാനിച്ചിട്ടുണ്ട്. അന്നേദിവസം തന്നെ ട്രാക്ടർ മാർച്ചുംപ്രഖ്യാപിച്ചിട്ടുണ്ട്. പഞ്ചാബിലെ സംഗ്രൂർ ജില്ലയിലെ ഖനൗരി പോയിൻ്റിൽ കർഷകരുടെ ഡൽഹി ചലോ മാർച്ച് പോലീസ് തടഞ്ഞതിനെ തുടർന്ന് ഹരിയാന പോലീസും പഞ്ചാബ് കർഷകരും തമ്മിലുള്ള ഏറ്റുമുട്ടലിനിടെ ബുധനാഴ്ചയാണ് ശുഭകരൻ സിംഗ് (21) കൊല്ലപ്പെട്ടത്. തങ്ങളുടെ വിളകളുടെ മിനിമം താങ്ങുവിലയ്ക്ക് കേന്ദ്രത്തിൽ നിന്ന് നിയമപരമായ ഉറപ്പ് ആവശ്യപ്പെട്ടുകൊണ്ടാണ് പഞ്ചാബിലെ കർഷകർ ഡൽഹി ചലോ മാർച്ച് നടത്തുന്നത്.
ഫെബ്രുവരി 26-ന് രാജ്യത്തുടനീളമുള്ള ഹൈവേകളിൽ കർഷകർ ട്രാക്ടർ മാർച്ച് നടത്തുമെന്നും പ്രഖ്യാപിച്ചിട്ടുണ്ട്. മാർച്ച് 14-ന് ഡൽഹിയിൽ മഹാപഞ്ചായത്ത് നടത്തുമെന്നും കർഷകരുടെ യോഗത്തിൽ തീരുമാനം കെെക്കൊണ്ടിരുന്നു. പോലീസ് നടപടിയെ അപലപിച്ച് കർഷകർ വെള്ളിയാഴ്ച കേന്ദ്ര ആഭ്യന്തര മന്ത്രി അമിത് ഷായുടെയും ഹരിയാന ആഭ്യന്തര മന്ത്രി അനിൽ വിജിൻ്റെയും കോലം കത്തിക്കാനും തീരുമാനിച്ചിട്ടുണ്ടെന്നാണ് വിവരം.
ഖനൗരി അതിർത്തിയിൽ പ്രതിഷേധിച്ച കർഷകൻ മരിച്ച സംഭവത്തിൽ കൊലപാതകത്തിന് കേസെടുക്കണമെന്നും കുടുംബത്തിന് ഒരു കോടി രൂപ നഷ്ടപരിഹാരം നൽകണമെന്നും എസ്കെഎം നേതാവ് ബൽബീർ സിംഗ് രാജേവൽ പറഞ്ഞു. ‘ഡൽഹി ചലോ’ ആഹ്വാനത്തിൽ ആയിരക്കണക്കിന് കർഷകർ ക്യാമ്പ് ചെയ്യുന്ന ശംഭു, ഖനൗരി അതിർത്തിയിലെ സ്ഥിതിഗതികൾ ചർച്ച ചെയ്യാൻ എസ്കെഎം വ്യാഴാഴ്ച യോഗം ചേർന്നു. പഞ്ചാബ്, ഹരിയാന, മറ്റ് സംസ്ഥാനങ്ങളിൽ നിന്നുള്ള നിരവധി എസ്കെഎം നേതാക്കൾ യോഗത്തിൽ പങ്കെടുത്തിരുന്നു.
വിളകൾക്ക് എംഎസ്പിയുടെ നിയമപരമായ പരിരക്ഷയും കാർഷിക വായ്പ എഴുതിത്തള്ളലും ഉൾപ്പെടെയുള്ള ആവശ്യങ്ങൾ ഉന്നയിച്ചു കൊണ്ടാണ് കർഷക മാർച്ച് നടക്കുന്നത്. സർക്കാരിൽ സമ്മർദ്ദം ചെലുത്തുന്നതിനായി സംയുക്ത കിസാൻ മോർച്ചയും (രാഷ്ട്രീയേതര) കിസാൻ മസ്ദൂർ മോർച്ചയുമാണ് (കെഎംഎം) ഡൽഹി ചലോ മാർച്ചിന് നേതൃത്വം നൽകുന്നത്. യുവകർഷകൻ ശുഭകരൻ സിംഗ് ബുധനാഴ്ച മരിച്ചതിനെത്തുടർന്ന് കർഷക നേതാക്കൾ ഡൽഹി ചലോ മാർച്ച് രണ്ട് ദിവസത്തേക്ക് നിർത്തിവച്ചിരുന്നു, കർഷകരുടെ അടുത്ത നടപടി വെള്ളിയാഴ്ച വൈകുന്നേരം തീരുമാനിക്കുമെന്ന് സംയുക്ത കർഷക മോർച്ച വ്യക്തമാക്കി.
