ഇസ്രായേൽ-പലസ്തീൻ സംഘർഷത്തിന്റെ പശ്ചാത്തലത്തിൽ മുസ്ലീം രാജ്യങ്ങളെ കുറ്റപ്പെടുത്തി ഡൽഹി ജുമാമസ്ജിദ് ഷാഹി ഇമാം സയ്യിദ് അഹമ്മദ് ബുഖാരി ഈ വിഷയത്തിൽ മുസ്ലീം രാജ്യങ്ങൾ തങ്ങളുടെ ഉത്തരവാദിത്തം നിറവേറ്റിയില്ലെന്ന് അദ്ദേഹം പറഞ്ഞു. ഇസ്രയേലിനുമേൽ നയതന്ത്ര സമ്മർദ്ദം ചെലുത്തി യുദ്ധം അവസാനിപ്പിക്കണമെന്ന് അഹമ്മദ് ബുഖാരി പ്രധാനമന്ത്രി നരേന്ദ്ര മോദിയോട് ആവശ്യപ്പെട്ടു. ഈ യുദ്ധം ഇതിനകം 21,300 പലസ്തീനികളെ കൊന്നൊടുക്കിയിരി്കുന്നു. ഇതിലൂടെ ലോകത്ത് മറ്റൊരു മാനുഷിക പ്രതിസന്ധി ഉടലെടുക്കുകയും ചെയ്തു. ഗാസയിലെ ജനസംഖ്യയുടെ നാലിലൊന്ന് പട്ടിണി മൂലം മരിക്കുന്നുവെന്നും അദ്ദേഹം ചൂണ്ടിക്കാട്ടി. ഐക്യരാഷ്ട്രസഭയുടെയും അറബ് ലീഗിൻ്റെയും ഗൾഫ് സഹകരണ കൗൺസിലിൻ്റെയും പ്രമേയങ്ങളുടെ അടിസ്ഥാനത്തിൽ ഈ പ്രശ്നത്തിന് ഉടനടി ശാശ്വതമായ പരിഹാരം കാണണമെന്നും അദ്ദേഹം ആവശ്യപ്പെട്ടു. പരിഹാരം കാണേണ്ട തലത്തിലേക്ക് പലസ്തീൻ പ്രശ്നം എത്തിയതായും രണ്ടു രാജ്യങ്ങളെന്ന ആശയമാണ് ഇവിടെ പ്രാവർത്തികമാകേണ്ടതെന്നും ബുഖാരി പ്രസ്താവനയിൽ പറഞ്ഞു.
മുസ്ലീം ലോകം ഇക്കാര്യത്തിൽ തങ്ങളുടെ ഉത്തരവാദിത്തങ്ങൾ നിറവേറ്റിയിട്ടില്ലെന്നും അഹമ്മദ് ബുഖാരി പറഞ്ഞു. ഇക്കാര്യത്തിൽ അവർ സ്വീകരിക്കേണ്ട നടപടികൾ സ്വീകരിക്കുന്നില്ല, ഇത് വളരെ നിരാശജനകമാണ്. ഇക്കാര്യത്തിൽ അവസാനമായി പ്രധാനമന്ത്രി ഇടപശടണമെന്നാണ് തനിക്ക് അഭ്യർത്ഥിക്കാനുള്ളതെന്നും അദ്ദേഹം പറഞ്ഞു. ഇസ്രായേലുമായുള്ള വ്യക്തിപരമായ ബന്ധത്തിൻ്റെ അടിസ്ഥാനത്തിൽ യുദ്ധം അവസാനിപ്പിക്കാനും പ്രശ്നങ്ങൾ പരിഹരിക്കാനും എൻ്റെ രാജ്യത്തിൻ്റെ പ്രധാനമന്ത്രി നയതന്ത്ര സമ്മർദ്ദം ചെലുത്തുമെന്ന് താൻ പ്രതീക്ഷിക്കുന്നുവെന്നും ബുഖാരി പറഞ്ഞു. ഇസ്രായേൽ-ഹമാസ് സംഘർഷത്തിൽ ഉടനടി മാനുഷിക വെടിനിർത്തലും ബന്ദികളെ നിരുപാധികം മോചിപ്പിക്കണമെന്നും ആവശ്യപ്പെട്ട് ഈ മാസമാദ്യം യുഎൻ ജനറൽ അസംബ്ലിയിലെ കരട് പ്രമേയത്തിൽ ഇന്ത്യ അനുകൂലമായി വോട്ട് ചെയ്തിരുന്നു.
ഒക്ടോബർ 7 ന്, ഹമാസ് തീവ്രവാദികൾ ഇസ്രായേലിനെതിരെ ഏറ്റവും വലിയ ആക്രമണം നടത്തിയതോടെയാണ് ഇസ്രായേൽ- ഹമാസ് യുദ്ധത്തിന് ആരംഭമായത്. ഈ ആക്രമണത്തിൽ 1200 ഓളം ഇസ്രായേലികൾ കൊല്ലപ്പെട്ടു. സ്ത്രീകളും കുട്ടികളും പ്രായമായവരുമടക്കം 240 പേരെ ബന്ദികളാക്കുകയും ചെയ്തിരുന്നു. ഈ ബന്ദികളിൽ പലരെയും മോചിപ്പിച്ചെങ്കിലും നിരവധി ബന്ദികളുടെ മൃതദേഹങ്ങൾ കണ്ടെടുക്കുകയും ചെയ്തിരുന്നു. ഈ യുദ്ധത്തിൽ ഇതുവരെ 20,000 ത്തിലധികം പേർ ഗാസയിൽ കൊല്ലപ്പെട്ടിട്ടുണ്ടെന്നാണ് കണക്കുകൾ സൂചിപ്പിക്കുന്നത്.
