ആറുകാരി പീഡനത്തിന് ഇരയായി കൊല്ലപ്പെട്ട സംഭവത്തിൽ പ്രതിയെ കുറ്റവിമുക്തനാക്കിയ കോടതി നടപടിക്കെതിരെ അപ്പീൽ നൽകാനൊരുങ്ങി സംസ്ഥാന സർക്കാർ കോടതിവിധി പരിശോധിച്ച് തുടർനടപടി സ്വീകരിക്കുമെന്നും വിധിയിൽ അപ്പീൽ നൽകാൻ തീരുമാനിച്ചുവെന്നും മുഖ്യമന്ത്രി കഴിഞ്ഞദിവസം വ്യക്തമാക്കിയിരുന്നു. കോടതി വിധിക്കെതിരെ പൊതുജനങ്ങളിൽ നിന്നും വ്യാപകമായ എതിർപ്പു ഉയർന്ന സാഹചര്യത്തിൽ അപ്പീൽ നൽകുന്ന കാര്യം അടിയന്തരമായി പൂർത്തിയാക്കാനാണ് സംസ്ഥാന സർക്കാർ തീരുമാനിച്ചിരിക്കുന്നത്. വണ്ടിപ്പെരിയാറില് ആറു വയസ്സുകാരിയെ പീഡിപ്പിച്ച കേസില് യുവാവിനെ കോടതി വെറുതേ വിട്ട സംഭവം ഏറെ ഞെട്ടലുണ്ടാക്കിയിരുന്നു. കോടതിവിധി പുറത്തുവന്നതിന് പിന്നാലെ പൊലീസിനും കോടതിക്കും എതിരെ കൊല്ലപ്പെട്ട കുട്ടിയുടെ മാതാപിതാക്കളും ബന്ധുക്കളും രംഗത്തെത്തിയിരുന്നു.
നമുക്കെല്ലാ യാത്രയ്ക്കിടെ നടന്ന പത്രസമ്മേളനത്തിൽ വച്ച് വണ്ടിപ്പെരിയാർ കേസിലെ കോടതി വിധിയ്ക്കെതിരെ മുഖ്യമന്ത്രി പിണറായി വിജയൻ പ്രതികരിച്ചിരുന്നു. വണ്ടിപ്പെരിയാര് പോക്സോ കേസില് സംസ്ഥാനത്തിന് അഭിമാനകരമായ കാര്യമല്ല സംഭവിച്ചതെന്നാണ് അദ്ദേഹം പറഞ്ഞത്. കോടതി ഇത്തരത്തിൽ വിധി പറയേണ്ട സാഹചര്യം എന്താണെന്ന് പരിശോധിക്കുമെന്നും അതിനുശേഷം തുടർനടപടികൾ സ്വീകരിക്കുമെന്നും മുഖ്യമന്ത്രി പറഞ്ഞിരുന്നു. താമസിക്കാതെ തന്നെ വിധിയിൽ അപ്പീൽ നൽകുമെന്നാണ് മുഖ്യമന്ത്രി കഴിഞ്ഞദിവസം സൂചിപ്പിച്ചത്. അതിന് പിന്നാലെയാണ് അപ്പിൽ നൽകാൻ തീരുമാനിച്ചുവെന്ന വിവരം പുറത്തുവരുന്നതും.
അതേസമയം വണ്ടിപ്പെരിയാർ കൊലപാതക കേസിൽ കേസില് അട്ടിമറി നടന്നുവെന്നും ഇക്കാര്യത്തിൽ അന്വേഷണം വേണമെന്നും പ്രതിപക്ഷ നേതാവ് വിഡി സതീശന് പറഞ്ഞു. അന്വേഷണ ഉദ്യോഗസ്ഥന് ചെയ്തത് തെറ്റാണെന്നും പ്രാഥമിക തെളിവുകള് പോലും ശേഖരിച്ചില്ലെന്നും ശേഖരിച്ച തെളിവുകള് കോടതിയില് വേണ്ടവണ്ണം ഹാജരാക്കിയില്ലെന്നും പ്രതിപക്ഷ നേതാവ് പറഞ്ഞു. കേസില് ഉണ്ടായത് ഞെട്ടിക്കുന്ന വിധിയായിരുന്നെന്നും പ്രതിപക്ഷ നേതാവ് ചൂണ്ടിക്കാട്ടി.
