ഇന്ത്യന് വിദ്യാര്ഥികള്ക്ക് നേരെ നടക്കുന്ന ആക്രമണങ്ങളെ അപലപിച്ച് യുഎസ്. അക്രമത്തിന് ഒഴികഴിവില്ല. തീര്ച്ചയായും വംശമോ ലിംഗഭേദമോ മതമോ മറ്റേതെങ്കിലും ഘടകമോ അടിസ്ഥാനമാക്കിയുള്ളതാണ് ഈ ആക്രമണങ്ങള്. അമേരിക്കയില് അത് അസ്വീകാര്യമാണെന്നും വൈറ്റ് ഹൗസിലെ നാഷണല് സെക്യൂരിറ്റി കൗണ്സിലിലെ സ്ട്രാറ്റജിക് കമ്മ്യൂണിക്കേഷന്സ് കോര്ഡിനേറ്റര് ജോണ് കിര്ബി പറഞ്ഞു. ഇന്ത്യയില് നിന്നുള്ള വിദ്യാര്ത്ഥികള്ക്ക് നേരെയുള്ള ആക്രമണ പരമ്പരയെക്കുറിച്ചുള്ള ചോദ്യത്തിനായിരുന്നു മറുപടി. കഴിഞ്ഞ ഏതാനും ആഴ്ചകള്ക്കുള്ളില് നാല് ഇന്ത്യന്- അമേരിക്കന് വിദ്യാര്ത്ഥികളാണ് മരിച്ചത്.
‘അത്തരത്തിലുള്ള ആക്രമണങ്ങളെ തടയാനും അവരെ പരിഗണിക്കുന്ന ആര്ക്കും അത് വ്യക്തമാക്കാനും ശ്രമിക്കുന്നതിന് സംസ്ഥാന-പ്രാദേശിക അധികാരികളുമായി ചേര്ന്ന് പ്രവര്ത്തിക്കാന് ഞങ്ങള് കഴിയുന്നതെല്ലാം ചെയ്യുന്നുണ്ടെന്ന് ഉറപ്പാക്കാന് പ്രസിഡന്റും ഈ ഭരണകൂടവും വളരെ കഠിനമായി പരിശ്രമിക്കുന്നു.’ കിര്ബി പറഞ്ഞു.
ജനുവരിയില് ജോര്ജിയയിലെ ലിത്തോണിയയില് ഒരു ഡിപ്പാര്ട്ട്മെന്റ് സ്റ്റോറില് പാര്ട്ട് ടൈം ജോലി ചെയ്ത് വരികയായിരുന്ന വിവേക് സൈനി എന്ന വിദ്യാർത്ഥിയെ മയക്കുമരുന്നിന് അടിമയായ അക്രമി കൊലപ്പെടുത്തിയിരുന്നുവിവേക് സൈനിയെ ചുറ്റിക കൊണ്ട് 50 തവണ അടിച്ചതിൻ്റെ ദൃശ്യങ്ങൾ വീഡിയോയിൽ പതിഞ്ഞിട്ടുണ്ട്. ഇന്ത്യാന വെസ്ലിയന് യൂണിവേഴ്സിറ്റിയിലെ ഇന്ത്യന് വിദ്യാര്ത്ഥി സയ്യിദ് മസാഹിര് അലിയും ഫെബ്രുവരിയില് ആക്രമിക്കപ്പെട്ടിരുന്നു.
ഇല്ലിനോയിസ് ഉര്ബാന-ചാമ്പെയ്നിലെ യൂണിവേഴ്സിറ്റിയിലെ അകുല് ധവാനും പര്ഡ്യൂ യൂണിവേഴ്സിറ്റിയിലെ നീല് ആചാര്യയും ജനുവരിയില് രാത്രിയില് കുറഞ്ഞ താപനിലയില് ദീര്ഘനേരം സമ്പര്ക്കം പുലര്ത്തിയതിന് പിന്നാലെ അമിതമായ മദ്യപാനം മൂലമാണ് മരിച്ചത്. നീൽ ആചാര്യയെ കഴിഞ്ഞ മാസം കാണാതായതായി റിപ്പോർട്ട് ചെയ്യപ്പെട്ടതിനെത്തുടർന്നാണ് ക്യാമ്പസിൽ മരിച്ച നിലയിൽ കണ്ടെത്തിയത്. കമ്പ്യൂട്ടർ സയൻസിലും ഡാറ്റാ സയൻസിലും ഡബിൾ മേജറും ജോൺ മാർട്ടിൻസൺ ഹോണേഴ്സ് കോളേജിലെ അംഗവുമായിരുന്നു നീൽ ആചാര്യ. സിന്സിനാറ്റിയിലെ ലിന്ഡ്നര് സ്കൂള് ഓഫ് ബിസിനസിലെ ഇന്ത്യന് വംശജനായ വിദ്യാര്ത്ഥി ശ്രേയസ് റെഡ്ഡി ബെനിഗെരിയെ ഈ മാസം ഒഹായോയിലും മരിച്ച നിലയില് കണ്ടെത്തി.
അമേരിക്കയിലെ ഇൻഡ്യാനയിലെ പർഡ്യൂ സർവകലാശാലയുടെ സമീപത്തെ വനത്തിൽ ഇന്ത്യൻ വംശജനായ ഡോക്ടറൽ വിദ്യാർത്ഥിയെ മരിച്ച നിലയിൽ കണ്ടെത്തിയിരുന്നു. യൂണിവേഴ്സിറ്റിക്ക് സമീപമുള്ള പ്രകൃതി സംരക്ഷണ കേന്ദ്രത്തിലെ വനത്തിൽ 23 കാരനായ സമീർ കാമത്തിൻ്റെ മൃതദേഹം കണ്ടെത്തിയത്. 2023 ഓഗസ്റ്റിൽ പർഡ്യൂവിൽ മെക്കാനിക്കൽ എഞ്ചിനീയറിംഗിൽ ബിരുദാനന്തര ബിരുദം നേടിയ സമീർ കാമത്ത് അതേ ഡിപ്പാർട്ട്മെൻ്റിൽ തുടർ പഠനം നടത്തുകയായിരുന്നു. സമീർ കാമത്തിന് അമേരിക്കൻ പൗരത്വമുണ്ടെന്ന് കൊറോണർ ഓഫീസ് അറിയിച്ചു.
