ജമ്മു കശ്മീരിൽ രാഷ്ട്രപതി ഭരണം പിൻവലിച്ചു, കേന്ദ്രഭരണപ്രദേശത്ത് പുതിയ സർക്കാർ രൂപീകരണത്തിന് വഴിയൊരുക്കുന്ന ഔദ്യോഗിക ഉത്തരവ് പ്രകാരമാണ് ഭരണം പിൻവലിക്കുന്നത്.ജമ്മു കശ്മീരിൽ അടുത്തിടെ നടന്ന നിയമസഭാ തെരഞ്ഞെടുപ്പിനെത്തുടർന്ന് പുതിയ സർക്കാർ രൂപീകരിക്കാനുള്ള അവകാശവാദം ഉന്നയിച്ച് നാഷണൽ കോൺഫറൻസ് നേതാവ് ഒമർ അബ്ദുള്ള വെള്ളിയാഴ്ച ലെഫ്റ്റനൻ്റ് ഗവർണർ മനോജ് സിൻഹയുമായി കൂടിക്കാഴ്ച നടത്തിയതിന് പിന്നാലെയാണിത്.
10 വർഷത്തെ ഇടവേളയ്ക്ക് ശേഷം ആദ്യമായാണ് ജമ്മു കശ്മീരിൽ നിയമസഭാ തിരഞ്ഞെടുപ്പ് നടക്കുന്നത്. 2018 ജൂൺ 19 ന് പിഡിപി-ബിജെപി സഖ്യം തകർന്നതിനെ പിന്നാലെ മേഖലയിൽ രാഷ്ട്രപതി ഭരണം ഏർപ്പെടുത്തി2019-ൽ സർക്കാർ ഭരണഘടനയുടെ ആർട്ടിക്കിൾ 370 റദ്ദാക്കുകയും പഴയ സംസ്ഥാനത്തെ കേന്ദ്രഭരണ പ്രദേശമാക്കി മാറ്റുകയും ചെയ്തു.
ജമ്മു കശ്മീർ നിയമസഭാ തിരഞ്ഞെടുപ്പിൽ നാഷണൽ കോൺഫറൻസ് (എൻസി) 42 സീറ്റുകൾ നേടിയപ്പോൾ കോൺഗ്രസിന് ആറ് സീറ്റുകൾ മാത്രമാണ് ലഭിച്ചത് – കശ്മീരിൽ അഞ്ച്, ജമ്മുവിൽ ഒന്ന്. ഇരുപാർട്ടികളും തെരഞ്ഞെടുപ്പിന് മുമ്പ് സഖ്യമുണ്ടാക്കിയിരുന്നു. തിരഞ്ഞെടുക്കപ്പെട്ട നാല് സ്വതന്ത്ര എംഎൽഎമാരുടെയും ആം ആദ്മി പാർട്ടിയുടെ (എഎപി) ഒരാളുടെയും പിന്തുണയാണ് അവരുടെ നില ശക്തിപ്പെടുത്തുന്നത്. 29 സീറ്റുകളുമായി ഭാരതീയ ജനതാ പാർട്ടി (ബിജെപി) രണ്ടാമത്തെ വലിയ കക്ഷിയായി ഉയർന്നു.
സെപ്തംബർ 18, സെപ്തംബർ 25, ഒക്ടോബർ 1 തീയതികളിൽ മൂന്ന് ഘട്ടങ്ങളിലായി നടന്ന തിരഞ്ഞെടുപ്പ്, ആർട്ടിക്കിൾ 370 റദ്ദാക്കിയതിന് ശേഷമുള്ള ആദ്യത്തേതാണ്, ഇത് ഒരു ചരിത്ര സംഭവമായി മാറി.
