ഡൽഹി മുഖ്യമന്ത്രി അരവിന്ദ് കെജ്രിവാളിന്റെ പ്രൈവറ്റ് സെക്രട്ടറി ബിഭവ് കുമാറിനെതിരെ ഗുരുതര ആരോപണങ്ങളുമായി എഎപി എംപി സ്വാതി മലിവാൾ എട്ട് തവണയോളം തന്നെ തല്ലിയ ബിഭവ് കുമാർ തന്റെ മാറിലും രഹസ്യ ഭാഗങ്ങളിലുമടക്കം ചവിട്ടിയെന്നും സ്വാതി മൊഴി നൽകിയിട്ടുണ്ടെന്ന് ഡൽഹി പൊലീസിന്റെ എഫ്ഐആറിൽ പറയുന്നു. വിവരം പുറത്തു പറഞ്ഞാൽ പ്രത്യാഘാതങ്ങൾ ഗുരുതരമായിരിക്കുമെന്ന് ബിഭവ് ഭീഷണിപ്പെടുത്തിയതായും എഫ്ഐആറിൽ പറയുന്നു.
മെയ് 13 ന് രാവിലെ 9 മണിയോടെ അരവിന്ദ് കെജ്രിവാളിൻ്റെ വീട്ടിലെ ഡ്രോയിംഗ് റൂമിലാണ് ദാരുണമായ പ്രവൃത്തി നടന്നതെന്ന് മുൻ ഡൽഹി വനിതാ കമ്മീഷൻ (ഡിസിഡബ്ല്യു) മേധാവി പറഞ്ഞു. സംഭവസമയത്ത് ഡൽഹി മുഖ്യമന്ത്രി തൻ്റെ വസതിയിൽ ഉണ്ടായിരുന്നു. എന്നാൽ, എഫ്ഐആറിൽ കെജ്രിവാളിൻ്റെ പേര് ഉൾപ്പെടുത്തിയിട്ടില്ല.
ഡ്രോയിംഗ് റൂമിൽ ഇരിക്കുകയായിരുന്നു താൻ, ബിഭവ് കുമാർ ഒരു പ്രകോപനവുമില്ലാതെ തന്നെ ചീത്തവിളിക്കുകയും മോശമായി പെരുമാറുകയും ചെയ്തുവെന്ന് സ്വാതി പറഞ്ഞു. അതിന് ശേഷം തന്നെ ക്രൂരമായി മർദ്ദിക്കുകയും ചെയ്തു. ‘ക്രൂരമായി തള്ളിയെറിഞ്ഞു, വീഴ്ച്ചയിൽ മുറിയിലെ മേശയിൽ എന്റെ തല ഇടിച്ചു… അയാൾ എന്റെ നെഞ്ചിലും വയറിലും സ്വകാര്യ ഭാഗത്തും ചവിട്ടി… തന്നെ ഉപദ്രവിക്കരുതെന്ന് കരഞ്ഞ് പറഞ്ഞെങ്കിലും അയാളത് കൂട്ടാക്കാൻ തയ്യാറായില്ല. എനിക്ക് ആർത്തവം ആണെന്ന് ആവർത്തിച്ചിട്ട് പറഞ്ഞിട്ടും പൂർണ്ണശക്തിയോടെ ആക്രമിച്ചു’ സ്വാതി പറഞ്ഞു
ഒടുവിൽ സ്വയം മോചിതയായെന്നും പോലീസിനെ വിളിച്ചെന്നും മലിവാൾ പറഞ്ഞു. ബിഭവ് കുമാറിനെതിരെ ഐപിസി സെക്ഷൻ 354 ,506 (ക്രിമിനൽ ഭീഷണിപ്പെടുത്തൽ), 509 (സ്ത്രീയുടെ മാന്യതയെ അപമാനിക്കാൻ ഉദ്ദേശിച്ചുള്ള വാക്ക്, ആംഗ്യ അല്ലെങ്കിൽ പ്രവൃത്തി), 323 (സ്വമേധയാ) എന്നീ വകുപ്പുകൾ പ്രകാരമാണ് കേസെടുത്തിരിക്കുന്നത്.
