സർക്കാർ ജോലിക്ക് വേണ്ടി സ്വന്തം പിതാവിനെ ക്വട്ടേഷൻ നൽകി കൊലപ്പെടുത്തി; മകൻ അറസ്റ്റിൽ!

റാഞ്ചി: ആശ്രയ നിയമനത്തിലൂടെ (മരണാനുകൂല്യം) സർക്കാർ ജോലി തട്ടിയെടുക്കുന്നതിനായി, സ്വന്തം പിതാവിനെ മകൻ ക്വട്ടേഷൻ സംഘത്തെ ഉപയോഗിച്ച് ക്രൂരമായി കൊലപ്പെടുത്തി. ജാർഖണ്ഡിലെ ധൻബാദ് ജില്ലയിലെ ബരൂറയിലാണ് മനുഷ്യ മനസ്സാക്ഷിയെ ഞെട്ടിക്കുന്ന ഈ സംഭവം നടന്നത്. ഭാരത് കോക്കിംഗ് കോൾ ലിമിറ്റഡ് (BCCL) എന്ന പൊതുമേഖലാ കൽക്കരി ഖനിയിലെ തൊഴിലാളിയായ ധുലേഷ്വർ നോനിയയാണ് കൊല്ലപ്പെട്ടത്. സംഭവത്തിൽ ഇയാളുടെ മകൻ വിജയ് നോനിയയെ പോലീസ് അറസ്റ്റ് ചെയ്തു.

കൊടുംക്രൂരതയ്ക്ക് പിന്നിലെ ചതിക്കുഴി

കൊല്ലപ്പെട്ട ധുലേഷ്വർ നോനിയയ്ക്ക് ജോലിയിൽ നിന്ന് വിരമിക്കാൻ ഇനി രണ്ട് വർഷം മാത്രമാണ് ബാക്കിയുണ്ടായിരുന്നത്. എന്നാൽ ഇയാളുടെ മകൻ വിജയ് നോനിയ പഠനം കഴിഞ്ഞിട്ടും ജോലി ഒന്നും ഇല്ലാതെ നടക്കുകയായിരുന്നു. കേന്ദ്ര-സംസ്ഥാന സർക്കാർ ജീവനക്കാർ സർവീസിലിരിക്കെ മരണപ്പെട്ടാൽ അവരുടെ ആശ്രിതർക്ക് (മക്കൾക്ക്) ജോലി ലഭിക്കുമെന്ന നിയമം വിജയ് മനസ്സിലാക്കി. പിതാവ് വിരമിക്കുന്നതിന് മുൻപ് അയാളെ കൊലപ്പെടുത്തിയാൽ ആ ജോലി തനിക്ക് തട്ടിയെടുക്കാമെന്ന ക്രൂരമായ ബുദ്ധിയാണ് മകനുണ്ടായത്.

10 ലക്ഷത്തിന്റെ ക്വട്ടേഷൻ

കൊലപാതകം ആസൂത്രണം ചെയ്യുന്നതിനായി വിജയ് പ്രദേശത്തെ കൽക്കരി മോഷ്ടാക്കളായ അമിത് സിംഗ്, അഖിലേഷ് മല്ല എന്നിവരുമായി കരാറുണ്ടാക്കി. പിതാവിനെ കൊലപ്പെടുത്തിയാൽ 10 ലക്ഷം രൂപ നൽകാമെന്നായിരുന്നു വാഗ്ദാനം. ജോലി കിട്ടിയ ശേഷം പണം നൽകാമെന്ന് ഏറ്റതിനാൽ പ്രതികൾ മുൻകൂർ പണമൊന്നും വാങ്ങിയില്ല.
തനിക്കെതിരെ യാതൊരു സംശയവും ഉണ്ടാകാതിരിക്കാൻ ജൂൺ 19-ന് രാവിലെ ബീഹാറിലുള്ള ബന്ധുവിന്റെ വിവാഹത്തിൽ പങ്കെടുക്കാൻ പോകുകയാണെന്ന് പിതാവിനോട് പറഞ്ഞ് വിജയ് നാട്ടിൽ നിന്നും മാറിനിന്നു.

മുഖം തകർത്തു, അപകടമെന്ന് വരുത്താൻ ശ്രമം

ജൂൺ 19-ന് രാത്രി ജോലി കഴിഞ്ഞ് കൽക്കരി ഖനിയിൽ നിന്നും പുറത്തിറങ്ങിയ ധുലേഷ്വറിനെ ബൈക്കിലെത്തിയ അമിത് സിംഗും മല്ലയും ചേർന്ന് നിർബന്ധിച്ച് കയറ്റി കൊണ്ടുപോയി. ആളൊഴിഞ്ഞ സ്ഥലത്തെത്തിച്ച ശേഷം വലിയ കല്ലുകൊണ്ട് തലയ്ക്കടിച്ച് ക്രൂരമായി കൊലപ്പെടുത്തുകയായിരുന്നു. തിരിച്ചറിയാതിരിക്കാൻ മുഖം പൂർണ്ണമായി തകർത്തു. പിന്നീട് ഇതൊരു റോഡപകടമാണെന്ന് വരുത്തിത്തീർക്കാൻ മൃതദേഹം ‘ചിതാഹി – ബരൂറ’ റോഡരികിൽ ഉപേക്ഷിച്ചു.
തുടർന്ന് നടത്തിയ പോലീസ് അന്വേഷണത്തിലാണ് മകന്റെ ക്രൂരമായ ചതി പുറത്തായത്. കേസിൽ മകനടക്കം മൂന്ന് പ്രതികളെയും പോലീസ് അറസ്റ്റ് ചെയ്തു. പണത്തിനും ജോലിക്കും വേണ്ടി സ്വന്തം പിതാവിന്റെ ജീവനെടുത്ത മകന്റെ ക്രൂരത ജാർഖണ്ഡിൽ വലിയ ജനരോഷത്തിന് കാരണമായിട്ടുണ്ട്.