നടപ്പ് സാമ്പത്തിക വർഷത്തിൻ്റെ മൂന്നാം പാദത്തിൽ ഇന്ത്യയുടെ മൊത്ത ആഭ്യന്തര ഉൽപ്പാദനം കുത്തനെ ഉയർന്നു 8.4 ശതമാനമായാണ് ജിഡിപിഉയർന്നത്. കഴിഞ്ഞ വർഷം ഇതേ കാലയളവിൽ ജിഡിപി വളർച്ച(India’s Q3 GDP growth) 4.3 ശതമാനമായിരുന്നു.
“2023-24 ലെ മൂന്നാം പാദത്തിൽ ജിഡിപി 43.72 ലക്ഷം കോടി രൂപയായി കണക്കാക്കപ്പെടുന്നു. 2022-23 ലെ മൂന്നാം പാദത്തിൽ ഇത് 40.35 ലക്ഷം കോടി രൂപയായിരുന്നു. ഇത് 8.4 ശതമാനം വളർച്ചാ നിരക്ക് കാണിക്കുന്നു,” കേന്ദ്ര സർക്കാരിൻ്റെ പ്രസ്താവനയിൽ പറയുന്നു.
മൂന്നാം പാദത്തിലെ ജിഡിപി വളർച്ച 7 ശതമാനത്തിൽ താഴെയാകുമെന്നാണ് വിശകലന വിദഗ്ധർ കണക്കാക്കിയിരുനന്നത്. എന്നാൽ സർക്കാർ പുറത്തുവിട്ട കണക്കുകൾ കാണിക്കുന്നത് ഇന്ത്യൻ സമ്പദ്വ്യവസ്ഥ അതിവേഗം വികസിക്കുന്നത് തുടരുന്നു എന്നാണ്. മൂന്നാം പാദത്തിലെ ജിഡിപി വളർച്ച രണ്ടാം പാദത്തിലെ 7.6 ശതമാനത്തേക്കാൾ മികച്ചതാണ് .
നിർമ്മാണ മേഖലയുടെ ഇരട്ട അക്ക വളർച്ചാ നിരക്കും (10.7 ശതമാനം), ഉൽപ്പാദന മേഖലയുടെ നല്ല വളർച്ചാ നിരക്കും (8.5 ശതമാനം) 2024 സാമ്പത്തിക വർഷത്തിലെ ജിഡിപി വളർച്ചയെ ഉയർത്തി.നടപ്പു സാമ്പത്തിക വർഷത്തിൻ്റെ മൂന്നാം പാദത്തിലെ 8.4 ശതമാനം വളർച്ചയ്ക്ക് പിന്നിലെ പ്രധാന കാരണങ്ങളായി ഈ മേഖലകളിലെ വളർച്ചയെ ചൂണ്ടിക്കാണിക്കുന്നു
ആര്ബിഐ കണക്കാക്കിയിരുന്നത്
2023-24സാമ്പത്തിക വര്ഷത്തില് 6.5 ശതമാനം ജിഡിപിയാണ് റിസര്വ് ബാങ്ക് ലക്ഷ്യമിട്ടിരുന്നത്. മൂന്നാം പാദത്തില് ഇത് 6 ശതമാനവും നാലാം പാദത്തില് 5.7 ശതമാനവും ആയിരിക്കും ജിഡിപി വളർച്ചയെന്ന് ആർബിഐ കണക്കാക്കപ്പെടുന്നു. നേരത്തെ ലോകത്തിലെ ഏറ്റവും വേഗത്തില് വളരുന്ന സമ്പദ് വ്യവസ്ഥയെന്ന നേട്ടം ഇന്ത്യ ആവര്ത്തിച്ചിരുന്നു . ഇന്ത്യയുടെ ഇടക്കാല ജിഡിപി വളര്ച്ചാ പ്രവചനം 0.7 ശതമാനം മുതല് 6.2 ശതമാനം വരെയായെന്നാണ് അമേരിക്കന് റേറ്റിംഗ് ഏജന്സിയായ ഫിച്ചിന്റെ കണക്ക്. മറുവശത്ത്, ചൈനയ്ക്ക് പട്ടികയില് കനത്ത തിരിച്ചടി നേരിട്ടു. ഇത്തവണ ചൈനയുടെ വളര്ച്ചാ പ്രവചനം ഗണ്യമായി കുറഞ്ഞെന്നാണ് ഏജന്സിയുടെ വിലയിരുത്തല്. നേരത്തെ ലോകബാങ്ക് മുതല് ഐഎംഎഫ് വരെ ഇന്ത്യന് സമ്പദ്വ്യവസ്ഥയുടെ വളര്ച്ചാ നിരക്ക് എസ്റ്റിമേറ്റ് പുതുക്കി വര്ദ്ധിപ്പിച്ചിരുന്നു.
