ഇറാൻ പ്രസിഡൻ്റ് ഇബ്രാഹിം റെയ്സിയും അദ്ദേഹത്തിൻ്റെ വിദേശകാര്യ മന്ത്രി ഹുസൈൻ അമിറാബ്ഡോൾഹിയാനും സഞ്ചരിച്ച ഹെലികോപ്റ്റർ തകർന്ന സ്ഥലത്ത് നിന്ന് “അതിജീവിച്ചവരെ ആരെയും” കണ്ടെത്തിയില്ലെന്ന് ഇറാൻ സ്റ്റേറ്റ് മീഡിയ തിങ്കളാഴ്ച അറിയിച്ചു.
“ഹെലികോപ്റ്റർ കണ്ടെത്തുമ്പോൾ യാത്രക്കാർ ആരും ജീവിച്ചിരിക്കുന്നതിൻ്റെ ഒരു സൂചനയും ഇല്ല.” സ്റ്റേറ്റ് ടിവി പറഞ്ഞു.
“പ്രതികൂല കാലാവസ്ഥയ്ക്കിടയിൽ മണിക്കൂറുകളോളം പർവതപ്രദേശങ്ങളിൽ തിരച്ചിൽ നടത്തിയ ശേഷമാണ് രക്ഷാസംഘങ്ങൾ തകർന്ന ഹെലികോപ്റ്റർ കണ്ടെത്തിയത്. അത് ഏതാണ്ട് പൂർണ്ണമായും കത്തി നശിച്ച നിലയിൽ ആയിരുന്നു.” ഒരു ഉദ്യോഗസ്ഥൻ വാർത്താ ഏജൻസിയായ റോയിട്ടേഴ്സിനോട് പറഞ്ഞു.
രാജ്യത്തിൻ്റെ വടക്ക് പടിഞ്ഞാറൻ പർവത മേഖലയിലെ ജോൽഫയിൽ ഞായറാഴ്ചയാണ് ഹെലികോപ്റ്റർ തകർന്നത്. റൈസിയും മറ്റുള്ളവരും അസർബൈജാനുമായുള്ള ഇറാൻ അതിർത്തി സന്ദർശിച്ച് മടങ്ങുന്നതിനിടെയാണ് സംഭവം.
റൈസി, അബ്ദുള്ളാഹിയൻ, മൂന്ന് ഇറാനിയൻ ഉദ്യോഗസ്ഥർ, ഒരു ഇമാം, ഫ്ലൈറ്റ്, സെക്യൂരിറ്റി ടീം അംഗങ്ങൾ എന്നിവരുൾപ്പെടെ ആകെ ഒമ്പത് പേരാണ് ഹെലികോപ്റ്ററിൽ ഉണ്ടായിരുന്നതെന്ന് ഇറാനിയൻ മാധ്യമങ്ങളെ ഉദ്ധരിച്ച് സിഎൻഎൻ റിപ്പോർട്ട് ചെയ്തു. മൂന്ന് ഉദ്യോഗസ്ഥരിൽ ഒരാൾ കിഴക്കൻ അസർബൈജാൻ പ്രവിശ്യയുടെ ഗവർണർ മാലെക് റഹ്മതി ആയിരുന്നു.
കിഴക്കൻ അസർബൈജാൻ പ്രവിശ്യയിൽ ഇടതൂർന്ന മൂടൽമഞ്ഞും കൊടും തണുപ്പും ഉള്ള പ്രയാസകരമായ കാലാവസ്ഥയിൽ തകർന്ന സ്ഥലം കണ്ടെത്താൻ തിങ്കളാഴ്ച രാത്രിയും പകലും തിരച്ചിൽ തുടർന്നു.
രക്ഷാപ്രവർത്തനത്തെ സഹായിക്കാൻ അയച്ച തുർക്കിയുടെ ‘അകിൻസി’ ഡ്രോണുകളിൽ ഒന്ന് ഹെലികോപ്റ്ററിൻ്റെ “അവശിഷ്ടങ്ങളെന്ന് സംശയിക്കുന്ന താപത്തിൻ്റെ ഉറവിടം” തിരിച്ചറിഞ്ഞതായി ദ ടെലിഗ്രാഫ് റിപ്പോർട്ട് ചെയ്തു. കത്തുന്ന സ്ഥലം കണ്ടെത്തി, രക്ഷാസേനയെ ‘തവിൽ’ എന്നറിയപ്പെടുന്ന പ്രദേശത്തേക്ക് അയച്ചതായി ഇറാനിയൻ മാധ്യമങ്ങൾ റിപ്പോർട്ട് ചെയ്തു. ഇറാൻ അധികൃതരുമായി തുർക്കി ഡ്രോൺ അതിൻ്റെ കോർഡിനേറ്റുകൾ പങ്കുവെച്ചിരുന്നു.
