എട്ട് ഇന്ത്യക്കാർക്ക് വധശിക്ഷ വിധിച്ച ഖത്തർ കോടതി നടപടിയ്ക്കെതിരെ സർക്കാർ അപ്പീൽ നൽകിയതായി വിദേശകാര്യ മന്ത്രാലയം (എംഇഎ) അറിയിച്ചു.ഒരു വർഷത്തിലറെയായി ഖത്തറിൽ തടവിൽ കഴിയുന്ന മുൻ ഇന്ത്യൻ നാവികസേനാംഗങ്ങൾക്കാണ് കോടതി വധശിക്ഷ വിധിച്ചത്.കഴിഞ്ഞ ഒക്ടോബറിലായിരുന്നു വിധി പ്രസ്താവിച്ചത്.
“വിധി രഹസ്യാത്മകമാണ്. നിയമ വകുപ്പുമായി വിധി പങ്കുവച്ചു. നിയമപരമായ എല്ലാ സാധ്യതകളും പരിഗണിച്ച് ഒരു അപ്പീൽ ഫയൽ ചെയ്തിട്ടുണ്ട്. ഞങ്ങൾ ഖത്തർ അധികൃതരുമായി ബന്ധപ്പെടുന്നുണ്ട്.”- എംഇഎ വ്യക്തമാക്കി.
തടവിലുള്ള ഇന്ത്യക്കാരുടെ കുടുംബാംഗങ്ങളുമായി വിദേശകാര്യ മന്ത്രാലയം ചർച്ച നടത്തിയിരുന്നു. കഴിഞ്ഞ ചൊവ്വാഴ്ച്ച ജയിലിൽ കഴിയുന്നവരുമായി സംസാരിക്കാൻ സാധിച്ചെന്നും വിദേശകാര്യ മന്ത്രാലയം അറിയിച്ചു
“ഞങ്ങൾ എല്ലാ നിയമപരവും കോൺസുലർ പിന്തുണയും നൽകുന്നത് തുടരും, കേസിന്റെ കണക്കിലെടുത്ത് ഊഹാപോഹങ്ങളിൽ ഏർപ്പെടരുതെന്ന് എല്ലാവരോടും അഭ്യർത്ഥിക്കുന്നു.”- മന്ത്രാലയം കൂട്ടിച്ചേർത്തു.
2022 ഓഗസ്റ്റിൽ ഖത്തറിലെ ഒരു കമ്പനിയിൽ ജോലിചെയ്യുവേ ഇസ്രായേലിന്റെ ചാരന്മാരായി പ്രവർത്തിച്ചുവെന്നാരോപിച്ച് എട്ട് മുൻ ഇന്ത്യൻ നേവി ഉദ്യോഗസ്ഥരെ ഖത്തർ കസ്റ്റഡിയിലെടുത്തിരുന്നു. മുൻ ഇന്ത്യൻ നാവികസേനാ ഉദ്യോഗസ്ഥരായ ക്യാപ്റ്റൻ നവതേജ് സിംഗ് ഗിൽ, ക്യാപ്റ്റൻ ബീരേന്ദ്ര കുമാർ വർമ, ക്യാപ്റ്റൻ സൗരഭ് വസിഷ്ത്, കമാൻഡർ അമിത് നാഗ്പാൽ, കമാൻഡർ പൂർണേന്ദു തിവാരി, കമാൻഡർ സുഗുണാകർ പകല, കമാൻഡർ സഞ്ജീവ് ഗുപ്ത, നാവികൻ രാഗേഷ് എന്നിവരെയാണ് ഖത്തർ ഇന്റലിജൻസ് ഏജൻസി അറസ്റ്റ് ചെയ്തത്.
കേസിൽ നാവിക സേനാംഗങ്ങൾ പലതവണ ജാമ്യാപേക്ഷ നൽകിയെങ്കിലും ഖത്തർ അധികൃതർ അത് തള്ളി. ഖത്തറിലെ ഫസ്റ്റ് ഇൻസ്റ്റൻസ് കോടതിയാണ് വധശിക്ഷ പ്രഖ്യാപിച്ചത്.
അതേസമയം നേരത്തെ, ഖത്തറില് വധശിക്ഷയ്ക്ക് വിധിക്കപ്പെട്ട എട്ട് മുന് നാവിക ഉദ്യോഗസ്ഥരുടെ കുടുംബാംഗങ്ങളുമായി വിദേശകാര്യ മന്ത്രി എസ് ജയശങ്കര് കൂടിക്കാഴ്ച നടത്തിയിരുന്നു. ഇന്ത്യക്കാരുടെ മോചനത്തിന് സര്ക്കാര് ഏറ്റവും വലിയ പ്രാധാന്യമാണ് നല്കുന്നതെന്ന് അദ്ദേഹം അറിയിച്ചു. കുടുംബങ്ങളുടെ ആശങ്കകളും വേദനകളും ഞങ്ങള് മനസ്സിലാക്കുന്നു.അവരുടെ മോചനം ഉറപ്പാക്കാനുള്ള എല്ലാ ശ്രമങ്ങളും സര്ക്കാര് തുടരുമെന്ന് അവര്ക്ക് ഉറപ്പ് നല്കിയിട്ടുണ്ടെന്നും അദ്ദേഹം വ്യക്തമാക്കി. വിദേശകാര്യ മന്ത്രി തന്നെയാണ് ഇക്കാര്യം സോഷ്യല് മീഡിയയിലൂടെ അറിയിച്ചത്
2022 മുതല് ഖത്തര് ജയിലില്
ഈ വര്ഷം മാര്ച്ച് അവസാനമാണ് കേസിന്റെ ആദ്യ ഹിയറിങ് നടന്നത്.അറസ്റ്റിലായ മുന് നാവികസേനാ ഉദ്യോഗസ്ഥരില് ഒരാളുടെ സഹോദരിയായ മിതു ഭാര്ഗവ ഖത്തറില് നിന്ന് തന്റെ സഹോദരനെ സുരക്ഷിതമായി തിരിച്ചെത്തിക്കുന്നതിനായി ഇന്ത്യയുടെ സഹായം തേടിയതോടെ വാര്ത്ത കൂടുതല് ശ്രദ്ധ നേടിയിരുന്നു. ‘ഈ മുന് നാവിക ഉദ്യോഗസ്ഥര് രാജ്യത്തിന്റെ അഭിമാനമാണ്.താമസിക്കാതെ എല്ലാവരെയും ഉടന് തന്നെ ഇന്ത്യയിലേക്ക് തിരികെ കൊണ്ടുവരേണ്ട സമയം അതിക്രമിച്ചിരിക്കുന്നുവെന്ന് ഞാന് പ്രധാനമന്ത്രി മോദിയോട് കൂപ്പുകൈകളോടെ അഭ്യര്ത്ഥിക്കുന്നു.’, ജൂണ് എട്ടിന് സോഷ്യല് മീഡിയ പ്ലാറ്റ്ഫോമായ എക്സില് മിതു എഴുതി.
ഖത്തര് കമ്പനിയില് ജോലി
വധശിക്ഷയ്ക്ക് വിധിക്കപ്പെട്ട എട്ട് പേരും ഖത്തറിലെ സ്വകാര്യ കമ്പനിയില് ജോലി ചെയ്യുന്നവരായിരുന്നു. ഖത്തര് എമിരി നേവിക്ക് പരിശീലനവും മറ്റ് സേവനങ്ങളും നല്കുന്നതാണ് ദഹ്റ ഗ്ലോബല് ടെക്നോളജി ആന്ഡ് കണ്സള്ട്ടന്സി സര്വീസസ് എന്ന ഈ കമ്പനി. ഖത്തര് പ്രതിരോധ വകുപ്പ്, സുരക്ഷ, മറ്റ് സര്ക്കാര് ഏജന്സികള് എന്നിവയുടെ പ്രാദേശിക പങ്കാളിയെന്നാണ് കമ്പനി സ്വയം വിശേഷിപ്പിക്കുന്നത്.റോയല് ഒമാന് എയര്ഫോഴ്സ് റിട്ടയേര്ഡ് സ്ക്വാഡ്രണ് ലീഡര് ഖമീസ് അല് അജാമിയാണ് ഈ കമ്പനിയുടെ സിഇഒ.
2022 ഓഗസ്റ്റ് 30ന് ഇസ്രായേലിന്റെ ചാരന്മാരായി പ്രവര്ത്തിച്ചുവെന്ന് ആരോപിച്ചാണ് ഖത്തർ രഹസ്യാന്വേഷണ ഏജന്സി അറസ്റ്റ് ചെയ്തത്. മുന് ഇന്ത്യന് നാവികസേനാ ഉദ്യോഗസ്ഥരായ ക്യാപ്റ്റന് നവതേജ് സിംഗ് ഗില്, ക്യാപ്റ്റന് ബീരേന്ദ്ര കുമാര് വര്മ്മ, ക്യാപ്റ്റന് സൗരഭ് വസിഷ്ത്, കമാന്ഡര് അമിത് നാഗ്പാല്, കമാന്ഡര് പൂര്ണേന്ദു തിവാരി, കമാന്ഡര് സുഗുണാകര് പകല, കമാന്ഡര് സഞ്ജീവ് ഗുപ്ത, നാവികന് രാഗേഷ് എന്നിവരാണ് പിടിയിലായത്.
ഇന്ത്യയുടെ ആദ്യപ്രതികരണം
നേരത്തെ കോടതി വിധി ഞെട്ടിക്കുന്നതാണെന്നും സാധ്യമായ എല്ലാ നിയമ നടപടികളും തേടുകയാണെന്നും വിദേശകാര്യ മന്ത്രാലയം പ്രാരംഭത്തിൽ പ്രതികരിച്ചിരുന്നു. ‘വധശിക്ഷ വിധി അഗാധമായ ഞെട്ടലുണ്ടാക്കി. വിശദമായ വിധിക്കായി കാത്തിരിക്കുകയാണ്. ഞങ്ങള് കുടുംബാംഗങ്ങളുമായും നിയമ സംഘവുമായും ബന്ധപ്പെടുന്നുണ്ട്. എല്ലാ നിയമ സാധ്യതകളും തേടുകയാണ് ചെയ്യുകയാണ്,’ വിദേശകാര്യ മന്ത്രാലയം (MEA) പുറത്തിറക്കിയ ഔദ്യോഗിക പ്രസ്താവനയില് പറഞ്ഞു.
‘ഞങ്ങള് ഈ കേസിന് ഉയര്ന്ന പ്രാധാന്യം നല്കുന്നുണ്ട്. കേസ് സൂക്ഷ്മമായി നിരീക്ഷിക്കുകയാണ്. എല്ലാ കോണ്സുലാര്, നിയമ സഹായങ്ങളും ഞങ്ങള് തുടരും,’ മന്ത്രാലയം കൂട്ടിച്ചേര്ത്തു. അതേസമയം നടപടികളുടെ രഹസ്യസ്വഭാവം അംഗീകരിച്ച് ഇപ്പോള് കൂടുതല് പ്രതികരിക്കാന് വിദേശകാര്യ മന്ത്രാലയം വിസമ്മതിച്ചു.
