അടുത്ത വർഷം ലോക്സഭാ തിരഞ്ഞെടുപ്പ് നടക്കാനിരിക്കെ നിര്ണായക നീക്കവുമായി കേന്ദ്ര സര്ക്കാര് വിലക്കയറ്റത്തില് നിന്ന് സാധാരണക്കാര്ക്ക് വലിയ ആശ്വാസം നല്കാനുള്ള പ്രഖ്യാപനങ്ങള് ഉടന് ഉണ്ടാകുമെന്നാണ് റിപ്പോര്ട്ട്. ഇതിന്റെ ഭാഗമായി പെട്രൊളിന്റെയും ഡീസലിന്റെയും വില കേന്ദ്ര സർക്കാർ ഉടൻ കുറച്ചേക്കും പെട്രോള്, ഡീസല് വില 6 മുതല് 10 രൂപ വരെ കുറയും. ഇത് സംബന്ധിച്ച് എണ്ണക്കമ്പനികളുമായി സര്ക്കാര് ചര്ച്ച നടത്തിവരികയാണ്.
കഴിഞ്ഞ വര്ഷം മെയ് 22 മുതല് പെട്രോള്, ഡീസല് വിലയില് മാറ്റമൊന്നും ഉണ്ടായിട്ടില്ല. പെട്രോള്, ഡീസല് വിലകള് വളരെക്കാലമായി മാറ്റമില്ലാതെ തുടരുന്നതിന്റെ ആശ്വാസത്തിലാണ് സാധാരണക്കാര്. കഴിഞ്ഞ തവണ കേന്ദ്രസര്ക്കാര് എക്സൈസ് തീരുവ കുറച്ചിരുന്നു. ഈ കാലയളവില് പെട്രോളിനും ഡീസലിനും ലിറ്ററിന് 13 രൂപയും 16 രൂപയുമാണ് യഥാക്രമം കുറച്ചത്.
ഇപ്പോള് പെട്രോളിന്റെയും ഡീസലിന്റെയും വില കുറയ്ക്കുന്നതിനെക്കുറിച്ച് പെട്രോളിയം മന്ത്രാലയവും ധനമന്ത്രാലയവും ചര്ച്ച നടത്തി വരികയാണ്. ഇതിന് പുറമെ എണ്ണക്കമ്പനികളുമായും ചര്ച്ചകള് നടക്കുന്നുണ്ട്. ചര്ച്ചകള് വിജയിച്ചാല് പെട്രോളിനും ഡീസലിനും 6 രൂപ മുതല് 10 രൂപ വരെ വില കുറയും.
ഡല്ഹിയില് പെട്രോള്, ഡീസല് നിരക്ക്
ഇന്ത്യന് ഓയില് കോര്പ്പറേഷന് (ഐഒസിഎല്) വെബ്സൈറ്റ് iocl.com അനുസരിച്ച്, ഡല്ഹി മുതല് കൊല്ക്കത്ത വരെ പെട്രോള്, ഡീസല് വില മാറ്റമില്ലാതെ തുടരുന്നു. ഇന്ന് ഡല്ഹിയില് പെട്രോള് വില 96.72 രൂപയും ഡീസലിന്റെ നിരക്ക് ലിറ്ററിന് 89.62 രൂപയുമാണ്. മുംബൈയില് പെട്രോളിന് 106.31 രൂപയും ഡീസലിന് 94.27 രൂപയുമാണ്. ചെന്നൈയില് പെട്രോള് വില ലിറ്ററിന് 102.63 രൂപയും ഡീസലിന് 94.24 രൂപയുമാണ്. അതേസമയം കൊല്ക്കത്തയില് പെട്രോള് ലിറ്ററിന് 106.03 രൂപയും ഡീസല് 92.76 രൂപയുമായി തുടരുന്നു
ക്രൂഡ് ഓയില് വിലയില് ഇടിവ്
കഴിഞ്ഞ കുറച്ച് മാസങ്ങളായി അന്താരാഷ്ട്ര വിപണിയില് ക്രൂഡ് ഓയിലിന്റെ വിലയില് കുറവുണ്ടായി എന്നത് ശ്രദ്ധേയമാണ്. നിലവില് വില ബാരലിന് 80 ഡോളറാണ്. അന്താരാഷ്ട്ര ക്രൂഡ് വിലയിലെ വ്യതിയാനം രാജ്യത്തെ പെട്രോളിന്റെയും ഡീസലിന്റെയും വിലയെ ബാധിക്കുമെന്നുള്ള കാര്യം ഉറപ്പാണ്.
ബാരലിന് ഒരു ഡോളർ കൂടിയാൽ…
അന്താരാഷ്ട്ര തലത്തിൽ ക്രൂഡ് ഓയിലിൻ്റെ വിലയിൽ ഒരു ഡോളറിൻ്റെ വർധനവുണ്ടായാൽ രാജ്യത്ത് പെട്രോളിനും ഡീസലിനും 50 മുതൽ 60 പൈസ വരെ വർധിക്കുമെന്നാണ് വിദഗ്ധരുടെ വിലയിരുത്തൽ. ക്രൂഡ് വിലയിൽ ഒരു ഡോളർ കുറഞ്ഞാൽ സമാനമായ രീതിയിൽ വിലക്കുറവ് ഉണ്ടാവുകയും ചെയ്യും. അന്താരാഷ്ട്ര വിപണിയിലെ ക്രൂഡോയിലിൻ്റെ വില, വിനിമയ നിരക്ക്, നികുതി, പെട്രോൾ- ഡീസൽ ഗതാഗത ചെലവുകൾ തുടങ്ങി നിരവധി കാര്യങ്ങൾ കണക്കിലെടുത്താണ് എണ്ണ കമ്പനികൾ ദിവസവും പെട്രോളിൻ്റെയും ഡീസലിൻ്റെയും വിലയിൽ മാറ്റം വരുത്തുന്നത്.
മുൻപ് ഈ ജോലി സർക്കാർ ചെയ്തിരുന്നെങ്കിലും 2014 ജൂണിനുശേഷം ചുമതല എണ്ണക്കമ്പനികൾക്ക് കൈമാറുകയായിരുന്നു. ക്രൂഡ് ഓയിൽ വിലയിലെ ഈ ഇടിവ് തുടരുകയും ലോക്സഭാ തിരഞ്ഞെടുപ്പിന് അരങ്ങൊരുങ്ങുകയും ചെയ്യുന്നതോടെ പുതുവർഷത്തിൽ രാജ്യത്ത് പെട്രോളിനും ഡീസലിനും വില കുറഞ്ഞേക്കുമെന്നുള്ളതാണ് വിദഗ്ധർ ചൂണ്ടിക്കാട്ടുന്നത്.
