തിരുവനന്തപുരം: മുഖ്യമന്ത്രിയായിരിക്കെ നിയമസഭയുടെ അവകാശങ്ങളെ ലംഘിക്കുന്ന നടപടി സ്വീകരിച്ച പിണറായി വിജയൻ പ്രതിപക്ഷ നേതൃസ്ഥാനം ഒഴിയണമെന്ന് മുതിർന്ന ബി.ജെ.പി നേതാവ് വി. മുരളീധരൻ എം.എൽ.എ ആവശ്യപ്പെട്ടു. മകൾ വീണ വിജയന്റെ ബിസിനസ് ഇടപാടുകൾ അവരുടെ വ്യക്തിഗതമായ ഔദ്യോഗിക കാര്യം മാത്രമാണെന്ന് നിയമസഭയിൽ പറഞ്ഞ പിണറായി വിജയൻ, സഭയെയും ജനങ്ങളെയും ഒരുപോലെ തെറ്റിദ്ധരിപ്പിക്കുകയായിരുന്നുവെന്നും അദ്ദേഹം കുറ്റപ്പെടുത്തി.
കരിമണൽ കമ്പനി ഉടമ ശശിധരൻ കർത്ത 2024-ൽ എൻഫോഴ്സ്മെന്റ് ഡയറക്ടറേറ്റിന് (ഇ.ഡി) നൽകിയ മൊഴി പുറത്തുവന്നതോടെ അനധികൃത സ്വത്ത് സമ്പാദനക്കേസുമായി ബന്ധപ്പെട്ട എല്ലാ വിവരങ്ങളും വ്യക്തമായിരിക്കുകയാണ്. പിണറായി വിജയനുമായുള്ള വ്യക്തിപരമായ അടുപ്പത്തിന്റെ പേരിലാണ് വീണ വിജയന്റെ അക്കൗണ്ടിലേക്ക് കരിമണൽ കമ്പനി പണം നൽകിയതെന്നും, അല്ലാതെ ഏതെങ്കിലും തരത്തിലുള്ള സേവനത്തിന്റെ പേരിലല്ലെന്നുമാണ് ശശിധരൻ കർത്തയുടെ മൊഴിയെന്ന് മുരളീധരൻ ചൂണ്ടിക്കാട്ടി.
മകളുടെ കമ്പനിക്ക് ലഭിച്ച ഈ തുകയ്ക്ക് പ്രത്യുപകാരമായി സർക്കാർ സംവിധാനങ്ങൾ ദുരുപയോഗം ചെയ്ത് കരിമണൽ കമ്പനിക്ക് എന്തൊക്കെ വഴിവിട്ട സഹായങ്ങളാണ് ചെയ്തുനൽകിയതെന്ന് പിണറായി വ്യക്തമാക്കണമെന്ന് അദ്ദേഹം ആവശ്യപ്പെട്ടു. സംഭവത്തിൽ മാർക്സിസ്റ്റ് പാർട്ടി കേരളത്തിലെ ജനങ്ങളോട് പരസ്യമായി മാപ്പപേക്ഷിക്കണമെന്നും വി. മുരളീധരൻ പറഞ്ഞു.
കരിമണൽ കമ്പനിയിൽ നിന്ന് ലഭിച്ച തുകയ്ക്ക് പുറമേ മറ്റെവിടെ നിന്നൊക്കെ സമാനമായ രീതിയിൽ കൈക്കൂലി വാങ്ങിയിട്ടുണ്ടെന്ന കാര്യത്തിൽ സമഗ്രമായ അന്വേഷണം നടത്തണമെന്നും അദ്ദേഹം കൂട്ടിച്ചേർത്തു.
