അധോലോക നായകൻ ദാവൂദ് ഇബ്രാഹിമിനെ കുറിച്ച് പ്രചരിക്കുന്ന വാര്ത്തകള് തള്ളി ഇന്റലിജന്സ് വൃത്തങ്ങള്. വിഷം ഉള്ളില്ച്ചെന്ന് ദാവൂദ് ഇബ്രാഹിമിനെ ആശുപത്രിയില് പ്രവേശിപ്പിച്ചെന്നായിരുന്നു റിപ്പോര്ട്ട്. ഇന്നലെ ഇക്കാര്യം സോഷ്യല് മീഡിയയില് വ്യാപകമായി പ്രചരിച്ചിരുന്നു. ഒരു പാക്കിസ്ഥാന് യൂട്യൂബര് പങ്കുവെച്ച വീഡിയോയാണ് ദാവൂദ് ഇബ്രാഹിമിന്റെ ആരോഗ്യനില മോശമാണെന്ന തരത്തിലുള്ള പ്രചാരണം കൂടുതല് ശക്തമാക്കിയത്. ഇതിനെ പാകിസ്ഥാനിലെ പെട്ടെന്നുള്ള ഇന്റര്നെറ്റ് നിരോധനവുമായി ബന്ധപ്പെടുത്തിയായിരുന്നു വീഡിയോ. എന്നാല് അധികൃതര് ഈ അവകാശവാദങ്ങള് തള്ളിക്കളഞ്ഞു. പ്രതിപക്ഷമായ പാകിസ്ഥാന്-തെഹ്രീകെ-ഇ-ഇന്സാഫിന്റെ (പിടിഐ) വെര്ച്വല് മീറ്റിംഗിനെ തുടര്ന്നാണ് ഇന്റര്നെറ്റ് കണക്ടിവിറ്റി തടസ്സപ്പെട്ടതെന്നായിരുന്നു ഇവരുടെ വാദം.
ആഗോള ഇന്റര്നെറ്റ് സ്വാതന്ത്ര്യം നിരീക്ഷിക്കുന്ന ഇന്റര്നെറ്റ് വാച്ച്ഡോഗ് ആയ നെറ്റ്ബ്ലോക്ക്സാണ് ഞായറാഴ്ച വൈകുന്നേരം ഏകദേശം ഏഴ് മണിക്കൂറോളം പാകിസ്ഥാനിലെ പ്രധാന സോഷ്യല് മീഡിയ പ്ലാറ്റ്ഫോമുകളില് നിയന്ത്രണങ്ങള് ഏര്പ്പെടുത്തിയതായി വെളിപ്പെടുത്തിയത്. എന്നാലിത് പിടിഐയുടെ വെര്ച്വല് മീറ്റിംഗിനെ തുടര്ന്നാണെന്നാണ് വാദമുയര്ന്നത്.
ദാവൂദ് ഇബ്രാഹിമിനെ ആശുപത്രിക്കുള്ളിൽ കർശന സുരക്ഷയിലാണ് പാർപ്പിച്ചിരിക്കുന്നതെന്നും ഉന്നത അധികാരികൾക്കും അദ്ദേഹത്തിന്റെ അടുത്ത കുടുംബാംഗങ്ങൾക്കും മാത്രമേ പ്രവേശനം അനുവദിച്ചിട്ടുള്ളൂവെന്നും വാർത്തകൾ പ്രചരിച്ചിരുന്നു. അതേസമയം സംഭവവുമായി ബന്ധപ്പെട്ട കൂടുതൽ വിവരങ്ങൾ ബന്ധുക്കളായ അലിഷാ പാർക്കർ, സാജിദ് വാഗ്ലെ എന്നിവരിൽ നിന്ന് കണ്ടെത്താൻ മുംബൈ പോലീസ് ശ്രമിക്കുന്നതായും സൂചനകൾ ലഭിച്ചു. രണ്ടാം വിവാഹത്തിന് ശേഷം ദാവൂദ് കറാച്ചിയിൽ താമസിച്ചു വരികയാണെന്ന്സഹോദരി ഹസീന പാർക്കറുടെ മകൻ ജനുവരിയിൽ ദേശീയ അന്വേഷണ ഏജൻസിയോട് പറഞ്ഞിരുന്നു.
പാക്കിസ്ഥാനിലെ പത്താൻ കുടുംബത്തിൽ നിന്നുള്ള യുവതിയെയാണ് ദാവൂദ് രണ്ടാമത് വിവാഹം കഴിച്ചിരിക്കുന്നത്. രണ്ടാം വിവാഹം കഴിഞ്ഞതിന് ശേഷം ദാവൂദ് തന്റെ ആദ്യ ഭാര്യ മഹ്ജബീനുമായി വിവാഹ മോചനം നേടിയിട്ടില്ലെന്നും വിവരങ്ങൾ പുറത്തുവന്നിരുന്നു. അതേസമയം രണ്ടാം വിവാഹം ദാവൂദിന്റെ ഒരു തന്ത്രമാണെന്നാണ് അന്വേഷണ ഏജൻസി പറഞ്ഞത്. ആദ്യ ഭാര്യ മഹ്ജബീനിൽ നിന്നും അന്വേഷണ ഏജൻസിയുടെ ശ്രദ്ധ തിരിക്കാനാകാം ഇതെന്നും വിവരമുണ്ട്. 2022 ജൂലൈയിൽ ദുബായിൽ വെച്ചാണ് ആദ്യ ഭാര്യ മഹ്ജബിനെ ദാവൂദ് ആദ്യമായി കാണുന്നത്. രണ്ടാം വിവാഹത്തിന്റെ വിവരം മഹ്ജബിനാണ് തന്നോട് പറഞ്ഞതെന്നും അലി ഷാ വെളിപ്പെടുത്തി.
ഇന്ത്യാ വിരുദ്ധ പ്രവർത്തനങ്ങൾക്കായി ദാവൂദ് ഇബ്രഹിം പ്രത്യേക വിഭാഗം രൂപീകരിച്ചത് സംബന്ധിച്ച് കഴിഞ്ഞ വർഷം രജിസ്റ്റർ ചെയ്ത കേസിലാണ് എൻഐഎയുടെ ചോദ്യം ചെയ്യൽ. ദാവൂദ് ഇബ്രാഹിമിന്റെ ഏറ്റവും പുതിയ വിലാസവും അലി ഷാ വെളിപ്പെടുത്തി. അലി ഷായുടെ പ്രസ്താവന പ്രകാരം, ദാവൂദ് ഇബ്രാഹിം ഇപ്പോൾ കറാച്ചിയിലെ ഡിഫൻസ് ഏരിയയിലെ അബ്ദുല്ല ഗാസി ബാബ ദർഗയ്ക്ക് പിന്നിലെ റഹീം ഫാക്കിക്ക് സമീപമാണ് താമസിക്കുന്നത്.
ദാവൂദ് ഇബ്രാഹിമും കൂട്ടാളിയും തമ്മിലുള്ള കോളുകള് ചോര്ന്നു
അന്താരാഷ്ട്ര ഉപരോധങ്ങള്ക്കിടയിലും, ദാവൂദ് ഇബ്രാഹിമും കുടുംബവും നിരവധി പതിറ്റാണ്ടുകളായി പാകിസ്ഥാനില് തുടരുകയാണ്. ‘ഡി കമ്പനി’ നേതാവായ ദാവൂദും സഹായി ഫാറൂഖും തമ്മിലുള്ള കോളുകളില് നിന്നാണ് ഇവരുടെ ജീവിതരീതിയെ കുറിച്ചുള്ള വിവരങ്ങള് പുറത്തുവന്നത്. ജിദ്ദയിലെ ഒരു സ്റ്റോറില് നിന്ന് തനിക്ക് ലൂയി വിറ്റണ് (എല്വി) ഷൂസ് വാങ്ങാന് ഇബ്രാഹിം ഫാറൂഖിനോട് നിര്ദ്ദേശിക്കുന്നുണ്ട്. ഷൂസിന്റെ സൈസ് 49 ആണെന്നും അത് ഒമ്പതായി പരിഗണിക്കണമെന്നും സംഭാഷണത്തിനിടെ പറയുന്നു.
