കോട്ടയം: കഞ്ചാവുമായി അന്യസംസ്ഥാനക്കാരായ 4 പേരെ പാലായിൽ പൊലീസ് അറസ്റ്റ് ചെയ്തു. ഒഡീഷ സ്വദേശികളായ ജഗന് മാലിക് (25), ഭൂനാഥ് മാലിക് (23), ബികേഷ് മാലിക് (25), ദീപു മാലിക് (28) എന്നിവരെയാണ് ജില്ലാ പൊലീസ് മേധാവിയുടെ നേതൃത്വത്തിലുള്ള ലഹരി വിരുദ്ധ സ്ക്വാഡ് പിടികൂടിയത്.
അന്യസംസ്ഥാന തൊഴിലാളികളെ കേന്ദ്രീകരിച്ച് വിൽപ്പനയ്ക്കായി സംസ്ഥാനത്തിന് വെളിയില് നിന്നും കഞ്ചാവ് എത്തിയിട്ടുള്ളതായി ജില്ലാ പൊലീസ് മേധാവി കെ.കാർത്തിക്കിന് ലഭിച്ച രഹസ്യവിവരത്തിന്റെ അടിസ്ഥാനത്തിൽ ജില്ലാ ലഹരിവിരുദ്ധ സ്ക്വാഡും, പാലാ പൊലീസും ചേര്ന്ന് നടത്തിയ പരിശോധനയിലാണ് പാലായിലെ പ്രമുഖ പ്ലൈവുഡ് കമ്പനിയിലെ ജീവനക്കാർ താമസിക്കുന്ന മുറിയിൽ നിന്നും 3.290 കിലോഗ്രാം കഞ്ചാവുമായി ഒഡീഷ സ്വദേശികളായ 4 പേരെ പിടികൂടുന്നത്. ഇവര്ക്ക് കഞ്ചാവ് എത്തിച്ചു കൊടുക്കുന്നവരെപറ്റിയുള്ള അന്വേഷണം നടത്തിവരികയാണ്. ഇവരെ കോടതിയിൽ ഹാജരാക്കി.
പാലാ സ്റ്റേഷൻ എസ്.എച്ച്.ഓ ജോബിൻ ആന്റണി, എസ്.ഐ മാരായ വി.എൽ ബിനു, സി.വി രാജു, എ.കെ അനിൽ, പ്രകാശ് ജോർജ്, എ.എസ്.ഐ മാരായ സുഭാഷ് വാസു, ഇ.എസ് സുമേഷ്, കൂടാതെ ജില്ലാ ലഹരി വിരുദ്ധ സ്ക്വാഡ് അംഗങ്ങളുമാണ് ജില്ലാ പൊലീസ് മേധാവിയുടെ സംഘത്തിൽ ഉണ്ടായിരുന്നത്.
