നവകേരള സദസിൽ മികച്ച സുരക്ഷ പ്രവർത്തനം നടത്തിയ പൊലീസുകാർക്ക് ഗുഡ് സർവ്വീസ് എൻട്രി നൽകാനുള്ള തീരുമാനത്തിനെതിരെ യുഡിഎഫ് രംഗത്ത്. മർദന വീരന്മാർക്കാണ് ഗുസ് സർവ്വീസ് എൻട്രി നൽകുന്നതെന്ന് എംഎം ഹസൻ പരിഹസിച്ചു. ഇതിനെതിരെ കോടതിയെ സമീപിക്കുമെന്നും അദ്ദേഹം വ്യക്തമാക്കി.
പ്രതിഷേധങ്ങളെ അടിച്ചൊതുക്കിയ പൊലീസ് നടപടിക്കെതിരെ വ്യാപക വിമർശനം ഉയരുമ്പോഴാണ് പ്രകടനം വിലയിരുത്തി പാരിതോഷികം നൽകാനുള്ള തീരുമാനം. കരിങ്കൊടി പ്രതിഷേധവുമായെത്തിയ പ്രവർത്തകർക്കെതിരെ സിപിഎംകാർക്കൊപ്പം പൊലീസും, മുഖ്യമന്ത്രിയുടെ ഗൺമാനും, എസ്കോർട്ട് സ്റ്റാഫും പ്രോട്ടോക്കാൾ ലംഘിച്ച് തല്ലിചതിച്ചിരുന്നു. ഇതിനെതിരെ രംഗത്തുവന്ന പ്രതിപക്ഷത്തിനു പിന്നാലെ കോടതി കയറേണ്ടി വന്ന പൊലീസ് നടപടിക്കാണിപ്പോൾ നവകേരള സമ്മാനം നൽകുന്നത്.
