ചൈന ഉൾപ്പെടെയുള്ള ചില രാജ്യങ്ങൾ ഇന്ത്യയെ ദേശീയ താൽപര്യങ്ങൾക്ക് വിരുദ്ധമായി സമ്മർദ്ദം ചെലുത്താൻ ശ്രമിക്കുന്നുണ്ടെന്ന് വിദേശകാര്യ മന്ത്രി എസ്.ജയശങ്കർ പറഞ്ഞു.
“ഭീകരതയുടെ വെല്ലുവിളി പാകിസ്ഥാനേക്കാൾ വലുതാണ്. നമ്മുടെ അതിർത്തികളിൽ സമ്മർദ്ദം ചെലുത്താൻ ചൈന ആഗ്രഹിക്കുന്നു. നമ്മുടെ താൽപ്പര്യങ്ങൾക്ക് വിരുദ്ധമായി നമ്മുടെ മേൽ സമ്മർദ്ദം ചെലുത്താൻ ശ്രമിക്കുന്ന മറ്റ് ചില രാജ്യങ്ങളും ഉണ്ട്,” അമൃത്സറിൽ ഒരു ഇൻ്ററാക്ടീവ് സെഷനിൽ സംസാരിക്കവെ ജയശങ്കർ പറഞ്ഞു.
“നമുക്ക് ഒരു ‘ വിക്ഷിത് ഭാരത്’ (വികസിത ഇന്ത്യ) സൃഷ്ടിക്കണമെങ്കിൽ, രാജ്യത്തിൻ്റെ താൽപ്പര്യങ്ങൾ ശക്തിപ്പെടുത്താനും അത് മുന്നോട്ട് കൊണ്ടുപോകാനും കഴിയുന്ന ഒരു സർക്കാരും ഒരു പ്രധാനമന്ത്രിയും എംപിമാരും ഉണ്ടായിരിക്കണം,” അദ്ദേഹം കൂട്ടിച്ചേർത്തു.
ബിജെപിയുടെ അമൃത്സർ സ്ഥാനാർത്ഥിയും യുഎസിലെ മുൻ ഇന്ത്യൻ അംബാസഡറുമായ തരൺജിത് സിംഗ് സന്ധുവിനെ കുറിച്ചും ജയശങ്കർ സംസാരിച്ചു.
“അദ്ദേഹം പൂർണ്ണഹൃദയത്തോടെ രാജ്യത്തെ സേവിച്ചു, ഇപ്പോൾ അദ്ദേഹത്തിന് അമൃത്സറിനെ സേവിക്കാനുള്ള സമയമായി, നിങ്ങൾ എല്ലാവരും അദ്ദേഹത്തിന് അവസരം നൽകിയാൽ മാത്രമെ അദ്ദേഹത്തിന് അത് സാധിക്കൂ” വിദേശകാര്യമന്ത്രി പറഞ്ഞു.സന്ധുവിനുവേണ്ടി പ്രചാരണത്തിനായി വെള്ളിയാഴ്ച അമൃത്സറിൽ റോഡ്ഷോയിൽ മന്ത്രി പങ്കെടുത്തിരുന്നു.
“അമൃത്സറിലെ ജനങ്ങൾ അദ്ദേഹത്തെ തിരഞ്ഞെടുത്ത് ഡൽഹിയിലേക്ക് (പാർലമെൻ്റ്) അയക്കുമെന്ന് ഞങ്ങൾക്ക് പൂർണ്ണ വിശ്വാസമുണ്ട്. അദ്ദേഹം പാർലമെൻ്റിൽ വളരെ നല്ല എംപിയായിരിക്കും. അദ്ദേഹം ഇന്ത്യയിലെ ഏറ്റവും ജനപ്രിയ അംബാസഡറാണ്,” വെള്ളിയാഴ്ച നാമനിർദേശ പത്രിക സമർപ്പിച്ചതിന് ശേഷം മാധ്യമപ്രവർത്തകരോട് സംസാരിക്കവെ ജയശങ്കർ പറഞ്ഞു.
