ന്യൂഡൽഹി: കർണാടകയിലെ ധർമസ്ഥലയിൽ 17 വയസ്സുകാരിയായ സൗജന്യ ബലാത്സംഗത്തിനിരയായി കൊല്ലപ്പെട്ട കേസിൽ സി.ബി.ഐ അന്വേഷണസംഘത്തെ രൂക്ഷമായി വിമർശിച്ച് സുപ്രീം കോടതി. സി.ബി.ഐയുടേത് മോശവും സ്വതന്ത്രമല്ലാത്തതുമായ അന്വേഷണമാണെന്ന് കുറ്റപ്പെടുത്തിയ കോടതി, കേസ് ഇനി സി.ബി.ഐയെ ഏൽപ്പിക്കാൻ കഴിയില്ലെന്നും വ്യക്തമാക്കി. അന്വേഷണം സംസ്ഥാന പോലീസിനു കൈമാറിയേക്കുമെന്ന സൂചന നൽകിയ കോടതി, കേസിൽ വിധി പറയാനായി മാറ്റി വെച്ചു. ജസ്റ്റിസുമാരായ സഞ്ജയ് കുമാർ, സഞ്ജീവ് സച്ച്ദേവ എന്നിവരടങ്ങിയ ബെഞ്ചാണ് ഹർജി പരിഗണിച്ചത്.
2012-ൽ രജിസ്റ്റർ ചെയ്ത കേസിൽ സമഗ്രമായ പുനരന്വേഷണത്തിനായി പ്രത്യേക അന്വേഷണസംഘം (SIT) രൂപീകരിക്കാൻ കർണാടക സർക്കാരിന് അനുമതി നൽകിയേക്കുമെന്നും കോടതി വ്യക്തമാക്കി.
ഉദ്യോഗസ്ഥൻ പെരുമാറിയത് ജഡ്ജിയെപ്പോലെ
കേസ് അന്വേഷിച്ച സി.ബി.ഐ അന്വേഷണ ഉദ്യോഗസ്ഥന്റെ പ്രവർത്തന രീതിയെ കോടതി കടുത്ത ഭാഷയിൽ വിമർശിച്ചു:
- ഉദ്യോഗസ്ഥൻ ഒരു ജഡ്ജിയെപ്പോലെയാണ് പെരുമാറിയത്. സ്വതന്ത്രമായ അന്വേഷണമൊന്നും നടന്നിട്ടില്ല.
- മുൻപ് ശേഖരിച്ച തെളിവുകൾ മാത്രം നോക്കിയാണ് അന്വേഷണ റിപ്പോർട്ട് സമർപ്പിച്ചത്.
- കുറ്റകൃത്യം നടന്ന സ്ഥലം സന്ദർശിക്കാനോ, കൊല്ലപ്പെട്ട പെൺകുട്ടിയുടെ അമ്മയുടെ മൊഴി രേഖപ്പെടുത്താനോ സി.ബി.ഐ തയാറായില്ല.
“ഒരു പെൺകുട്ടി ക്രൂരമായി ബലാത്സംഗം ചെയ്യപ്പെടുകയും കൊല്ലപ്പെടുകയും ചെയ്തിരിക്കുന്നു. ഇത് സി.ബി.ഐയുടെ തികച്ചും മോശമായ പ്രവർത്തനത്തെയാണ് കാണിക്കുന്നത്. അതിൽ കുറഞ്ഞോ കൂടിയോ ഒന്നും പറയാനില്ല.” – സുപ്രീം കോടതി
എസ്.ഐ.ടി അന്വേഷണം വേണമെന്ന് ഹർജിക്കാർ
വിരമിച്ച സുപ്രീം കോടതി ജഡ്ജിയുടെ നേതൃത്വത്തിലുള്ള സ്വതന്ത്ര എസ്.ഐ.ടി രൂപീകരിച്ച് പുനരന്വേഷണം നടത്തണമെന്ന് ഹർജിക്കാർക്ക് വേണ്ടി ഹാജരായ മുതിർന്ന അഭിഭാഷകരായ ശോഭ ഗുപ്ത, ആനന്ദ് സഞ്ജയ് എം.എൻ. യുലി, ശേഖർ ജി. ദേവാസ എന്നിവർ ആവശ്യപ്പെട്ടു. കേസ് അന്വേഷണത്തിൽ സംസ്ഥാന പോലീസ്, സി.ഐ.ഡി, സി.ബി.ഐ എന്നിവർ വരുത്തിയ ഗുരുതരമായ വീഴ്ചകളും അഭിഭാഷകർ ചൂണ്ടിക്കാട്ടി.
വാദവുമായി സി.ബി.ഐ; തിരിച്ചടിച്ച് കോടതി
എന്നാൽ പുനരന്വേഷണത്തെ സി.ബി.ഐ ശക്തമായി എതിർത്തു. 2013-ൽ ഏറ്റെടുത്ത കേസിൽ 2015-ൽ തന്നെ കുറ്റപത്രം സമർപ്പിച്ചതാണെന്നും, വിചാരണ പൂർത്തിയായ ശേഷം പുനരന്വേഷണം നടത്തുന്നത് ക്രിമിനൽ നടപടിക്രമങ്ങളെ അട്ടിമറിക്കുന്നതാണെന്നും സി.ബി.ഐ വാദിച്ചു.
എന്നാൽ, “12 വർഷത്തിനു ശേഷം തെളിവുകൾ കണ്ടെത്താൻ സി.ബി.ഐക്ക് കഴിയില്ലെന്നാണോ നിങ്ങൾ വാദിക്കുന്നത്?” എന്ന് കോടതി തിരിച്ചടിച്ചു.
കേസിൽ ഇനി സി.ബി.ഐയെ വിശ്വസിക്കാൻ കഴിയില്ലെന്ന് വ്യക്തമാക്കി ‘എന്തായാലും സി.ബി.ഐ ഈ കേസിൽനിന്ന് പുറത്താണ്’ എന്ന് നിരീക്ഷിച്ച കോടതി, അന്വേഷണം ഏറ്റെടുക്കാൻ സംസ്ഥാന സർക്കാർ തയാറാണെങ്കിൽ അവരുടെ സദുദ്ദേശ്യത്തെ സംശയിക്കേണ്ടതില്ലെന്നും കൂട്ടിച്ചേർത്തു. തുടർന്ന് കേസ് വിധി പറയാനായി കോടതി മാറ്റിവെക്കുകയായിരുന്നു.
