തിരുവനന്തപുരം: ശബരിമല സ്വർണ്ണക്കൊള്ള വിഷയത്തിൽ കോടതി ഇടപെടൽ മൂലം സർക്കാർ പൂർണ്ണമായും നിസ്സഹായാവസ്ഥയിലാണെന്ന് ദേവസ്വം മന്ത്രി കെ. മുരളീധരൻ. കേസിൽ സർക്കാരിന് ഒന്നും ചെയ്യാൻ കഴിയാത്ത സാഹചര്യമാണുള്ളത്. ഹൈക്കോടതി ചുമതലപ്പെടുത്തിയ പ്രത്യേക അന്വേഷണ സംഘം (എസ്.ഐ.ടി) കുറ്റപത്രം സമർപ്പിക്കാത്തതിനെ മന്ത്രി രൂക്ഷമായി വിമർശിച്ചു. കുറ്റപത്രം സമർപ്പിക്കുന്നത് അനിശ്ചിതമായി നീളുന്നത് സ്വർണ്ണക്കൊള്ള നടത്തിയവർ രക്ഷപ്പെടുന്നതിന് സഹായകമാകുമെന്നും മന്ത്രി കൂട്ടിച്ചേർത്തു.
കാര്യങ്ങൾ ഇത്തരത്തിലാണ് മുന്നോട്ട് പോകുന്നതെങ്കിൽ ഈ തലമുറയുടെ ആയുസ്സ് കഴിഞ്ഞാലും അന്വേഷണം അവസാനിക്കില്ലെന്ന് മന്ത്രി കെ. മുരളീധരൻ പരിഹസിച്ചു. എസ്.ഐ.ടിയുടെ അന്വേഷണ റിപ്പോർട്ട് പുറത്തുവരാത്തതിനാൽ സർക്കാരിന് ഈ വിഷയത്തിൽ ഇടപെടാൻ സാധിക്കുന്നില്ല.
“കോടതിയോട് ധിക്കാരമോ ബഹുമാനക്കുറവോ കാണിക്കുന്നതല്ല സർക്കാരിന്റെ നിലപാട്. സർക്കാരിന്റെ അവകാശങ്ങൾ സർക്കാരിന്റേതാണ്. ഭരണകൂടത്തിന്റെ ഭാഗത്ത് എന്തെങ്കിലും തെറ്റുകുറ്റങ്ങൾ ഉണ്ടെങ്കിൽ കോടതിക്ക് അത് ചൂണ്ടിക്കാണിക്കുകയും തിരുത്തിക്കുകയും ചെയ്യാം. എന്നാൽ എല്ലാ കാര്യങ്ങളിലും കോടതി ഇടപെടുന്നത് ശരിയായ പ്രവണതയല്ല.”
— മന്ത്രി കെ. മുരളീധരൻ
നിലവിൽ ശബരിമലയിൽ എല്ലാം ഹൈക്കോടതിയുടെ നിയന്ത്രണത്തിലാണെന്നും, അവിടെ സർക്കാരിനോ തിരുവിതാംകൂർ ദേവസ്വം ബോർഡിനോ യാതൊരു അവകാശവുമില്ലാത്ത അവസ്ഥയാണ് നിലനിൽക്കുന്നതെന്നും അദ്ദേഹം വ്യക്തമാക്കി.
ക്ഷേത്രങ്ങളുടെ ഭരണത്തിൽ കോടതികളുടെ അമിതമായ ഇടപെടലിനെതിരെ കഴിഞ്ഞ ദിവസവും മുരളീധരൻ വിമർശനവുമായി രംഗത്തെത്തിയിരുന്നു. മതപരവും ആചാരപരവുമായ കാര്യങ്ങളിൽ കോടതി ഇടപെടലുകൾ നടത്തുന്നതിന്റെ പരിധി പുനഃപരിശോധിക്കേണ്ട സമയം അതിക്രമിച്ചിരിക്കുന്നുവെന്നും ദേവസ്വം മന്ത്രി ആവർത്തിച്ചു വ്യക്തമാക്കി.
