ആലപ്പുഴ: വരാനിരിക്കുന്ന നെഹ്റു ട്രോഫി, സിബിഎൽ (CBL) വള്ളംകളി മത്സരങ്ങളിൽ തലവടി ചുണ്ടൻ വള്ളത്തിൽ കൈനകരി വില്ലേജ് ബോട്ട് ക്ലബ് തുഴയെറിയും. ഇത് സംബന്ധിച്ച ഔദ്യോഗിക കരാറിൽ ഒപ്പുവെക്കാൻ തീരുമാനിച്ചതായി ഭാരവാഹികളായ പ്രസിഡന്റ് റിക്സൺ എടത്തിൽ, സെക്രട്ടറി അരുൺ പുന്നശ്ശേരിൽ, ട്രഷറർ ഷിക്കു കുര്യൻ എന്നിവർ അറിയിച്ചു.
മത്സരങ്ങളുടെ മുന്നൊരുക്കങ്ങൾക്കായി തലവടി ചുണ്ടൻ വള്ളം സമിതി, തലവടി ടൗൺ ബോട്ട് ക്ലബ്, തലവടി ചുണ്ടൻ ഓവർസീസ് ഫാൻസ് അസോസിയേഷൻ (TOFA) എന്നിവയുടെ സംയുക്ത ആഭിമുഖ്യത്തിൽ വാർഡ് തല കോർഡിനേഷൻ കമ്മിറ്റികൾ രൂപീകരിച്ചു. കമ്മിറ്റിയുടെ പഞ്ചായത്ത് തല ഉദ്ഘാടനം പ്രസിഡന്റ് ബാബു വലിയവീടൻ നിർവഹിച്ചു.
സമിതി വൈസ് പ്രസിഡന്റ് ജോജി ജെ. വൈലപ്പള്ളി അധ്യക്ഷത വഹിച്ച ചടങ്ങിൽ വാർഡ് അംഗം അജിത്ത് പിഷാരത്ത്, ജോയിന്റ് സെക്രട്ടറി ഡോ. ജോൺസൺ വാലയിൽ ഇടിക്കുള, ടീം മാനേജർ ജോമോൻ ചക്കാലയിൽ, സിബി ജോർജ്ജ്, ടോഫാ കോർഡിനേറ്റർ പ്രദീപ് കുറുന്തോട്ടക്കൽ, ഷിനു ദിവാകരൻ, ബിനോയി മംഗലതാടിൽ, വിൽസൺ പൊയ്യാലുമാലിൽ എന്നിവർ പങ്കെടുത്തു സംസാരിച്ചു.
വള്ളംകളി മത്സരങ്ങളുടെ ധനസമാഹരണാർത്ഥം സമിതി നടത്തുന്ന നറുക്കെടുപ്പിന്റെ ആദ്യ കൂപ്പൺ പ്രകാശനവും ചടങ്ങിൽ നടന്നു. തോട്ടയ്ക്കാട്ട് പറമ്പിൽ നോഹ സിബി ജോർജ്ജിന് ആദ്യ കൂപ്പൺ നൽകിയാണ് പ്രകാശനം നിർവഹിച്ചത്.
