ന്യൂഡൽഹി: കണ്ണൂർ അഞ്ചരക്കണ്ടി മെഡിക്കൽ കോളേജിലെ ദളിത് വിദ്യാർത്ഥി നിതിൻ രാജിന്റെ ആത്മഹത്യയുമായി ബന്ധപ്പെട്ട് കുറ്റാരോപിതനായ ഡിപ്പാർട്ട്മെന്റ് മേധാവി ഡോ. എൻ. കെ. റാമിന്റെ മുൻകൂർ ജാമ്യാപേക്ഷ സുപ്രീം കോടതി തള്ളി. ഹൈക്കോടതി ജാമ്യം നിഷേധിച്ചതിനെ തുടർന്ന് ഡോ. റാം സമർപ്പിച്ച ഹർജിയാണ് സുപ്രീം കോടതി തള്ളിയത്.
കേസ് പരിഗണിച്ച ജസ്റ്റിസുമാരായ വിക്രം നാഥ്, സന്ദീപ് മേത്ത എന്നിവരടങ്ങിയ ബെഞ്ച് അധ്യാപകന്റെ പെരുമാറ്റത്തെ അതിശക്തമായ ഭാഷയിലാണ് വിമർശിച്ചത്. ഡോക്ടറുടെ പെരുമാറ്റം ‘ക്രൂരവും മനുഷ്യത്വമില്ലാത്തതുമാണ്’ എന്ന് കോടതി നിരീക്ഷിച്ചു. “ക്രൂരത എന്നൊരു വാക്ക് മാത്രമാണ് ഇതിൽ മനസ്സിലേക്ക് വരുന്നത്. അദ്ദേഹം എങ്ങനെയാണ് വിദ്യാർത്ഥികളോട് സംസാരിക്കുന്നത്?” എന്ന് ബെഞ്ച് ചോദിച്ചു. ചെയ്ത പ്രവൃത്തിയുടെ പ്രത്യാഘാതങ്ങൾ നേരിടാതെ അദ്ദേഹത്തിന് രക്ഷപെടാനാവില്ലെന്നും കോടതി വ്യക്തമാക്കി.
കേസിന്റെ പശ്ചാത്തലം:
അഞ്ചരക്കണ്ടി ഡെന്റൽ കോളേജ് വിദ്യാർത്ഥിയായിരുന്ന നിതിൻ രാജ് കഴിഞ്ഞ ഏപ്രിൽ 10-നാണ് കോളേജിന് സമീപത്തെ കെട്ടിടത്തിൽ നിന്ന് ചാടി ജീവനൊടുക്കിയത്. മരണത്തിന് മുൻപ് നിതിന് കോളേജിലെ അധ്യാപകരിൽ നിന്ന് കടുത്ത ജാതി അധിക്ഷേപവും പീഡനവും നേരിടേണ്ടി വന്നിരുന്നതായി ആരോപണമുയർന്നിരുന്നു.
നിതിന്റെ അച്ഛന്റെ പരാതിയുടെ അടിസ്ഥാനത്തിൽ ഡോ. റാം ഉൾപ്പെടെ മൂന്ന് ജീവനക്കാർക്കെതിരെ ആത്മഹത്യാ പ്രേരണക്കുറ്റവും, പട്ടികജാതി-പട്ടികവർഗ (അതിക്രമങ്ങൾ തടയൽ) നിയമപ്രകാരമുള്ള കുറ്റങ്ങളും ചുമത്തി പോലീസ് കേസെടുത്തിരുന്നു.
നേരത്തെ മുൻകൂർ ജാമ്യം തേടി ഡോ. റാമും മറ്റൊരു പ്രതിയായ ഫാക്കൽറ്റി അംഗം ഡോ. സംഗീത നമ്പ്യാരും സെഷൻസ് കോടതിയെ സമീപിച്ചിരുന്നു. ഏപ്രിൽ 25-ന് സെഷൻസ് കോടതി ഡോ. സംഗീതയ്ക്ക് ജാമ്യം അനുവദിച്ചെങ്കിലും ഡോ. റാമിന്റെ മുൻകൂർ ജാമ്യാപേക്ഷ തള്ളുകയായിരുന്നു. തുടർന്ന് ഡോ. റാം ഹൈക്കോടതിയെ സമീപിച്ചെങ്കിലും ജൂൺ 19-ന് ഹൈക്കോടതിയും ജാമ്യം നിഷേധിച്ചു. ഇതിന് പിന്നാലെയാണ് പ്രതി സുപ്രീം കോടതിയെ സമീപിച്ചതും ഇപ്പോൾ തിരിച്ചടി നേരിട്ടതും.
