കണ്ണൂർ: സിപിഎം സംസ്ഥാന കമ്മിറ്റിയംഗവും ഖാദി ബോർഡ് വൈസ് ചെയർമാനുമായ പി ജയരാജന്റെ മകൻ ജെയിൻ രാജിനെതിരെ പരോക്ഷ വിമർശനവുമായി ഡിവൈഎഫ്ഐ കണ്ണൂർ ജില്ലാ സെക്രട്ടറിയേറ്റ്. അർജുൻ ആയങ്കിയുടെ വിവാഹത്തിൽ പങ്കെടുത്ത ചിത്രം സഹിതം ഡിവൈഎഫ്ഐ പാനൂർ ബ്ലോക്ക് സെക്രട്ടറി കിരൺ പാനൂരിനെതിരെ കഴിഞ്ഞദിവസം ജെയിൻ രാജ് ഫേസ്ബുക്ക് കുറിപ്പ് ഇട്ടിരുന്നു. ഇതിന് മറുപടിയുമായിട്ടാണ് ഡിവൈഎഫ്ഐ രംഗത്തെത്തിയത്.കിരണിനെ അപകീർത്തിപ്പെടുത്താനുള്ള ശ്രമം കുബുദ്ധികളുടേതാണ്. അർജുൻ ആയങ്കി വിഷയം സംഘടന ചർച്ച ചെയ്തു തെറ്റുതിരുത്തൽ പ്രക്രിയയ്ക്കു വിധേയമാക്കിയതാണെന്നും സെക്രട്ടറിയേറ്റ് പ്രസ്താവിച്ചു. സ്വർണക്കടത്ത് കേസിലെ പ്രതിയും ഉറ്റ സുഹൃത്തുമായ അർജുൻ ആയങ്കിയുടെ കല്യാണത്തിന് 30 കിലോമീറ്റർ അപ്പുറം കല്യാണം കൂടാൻ പോയത് ഇവർ തമ്മിലൊരു ബന്ധവുമില്ലാത്തത് കൊണ്ടായിരിക്കുമെന്നാണ് ജെയിൻ രാജിന്റെ ഫേസ്ബുക്ക് പോസ്റ്റ്. ഇതിനെതിരെയാണ് ഡിവൈഎഫ്ഐ രംഗത്തുവന്നത്.ഡിവൈഎഫ്ഐ പാനൂർ ബ്ലോക്ക് സെക്രട്ടറിക്കെതിരെ സഭ്യേതര പ്രയോഗങ്ങൾ ആരു നടത്തിയാലും അംഗീകരിക്കില്ലെന്ന് ഡിവൈഎഫ്ഐ കണ്ണൂർ ജില്ലാ സെക്രട്ടറിയേറ്റ് പ്രസ്താവനയിൽ വ്യക്തമാക്കിയിട്ടുണ്ട്. നേരത്തെ ആകാശ് തില്ലങ്കേരി ഡിവൈഎഫ്ഐ ജില്ലാ നേതൃത്വത്തിനെതിരെ രംഗത്തുവന്നിരുന്നു.
