മൂവാറ്റുപുഴ: വ്യാപാര സ്ഥാപനത്തിൽ നിന്ന് ഒരുകോടി മുപ്പത്തേഴ് ലക്ഷത്തിലധികം രൂപ തട്ടിയെടുത്ത കേസിൽ അക്കൗണ്ടന്റിനെതിരെ മൂവാറ്റുപുഴ പോലീസ് കേസെടുത്തു. കാവുംങ്കര ഭാഗത്ത് പ്രവർത്തിക്കുന്ന ‘കെ.എം.പി ആന്റ് കമ്പനി’ എന്ന ഹോൾസെയിൽ പലചരക്ക് സ്ഥാപനത്തിലെ അക്കൗണ്ടന്റായ സുബീറിനെതിരെയാണ് പോലീസ് നടപടിയെടുത്തത്. സ്ഥാപന ഉടമ മൂവാറ്റുപുഴ കോട്ടക്കൽ വീട്ടിൽ ഷാജി നൽകിയ പരാതിയുടെ അടിസ്ഥാനത്തിലാണ് കേസ് രജിസ്റ്റർ ചെയ്തത്.
കഴിഞ്ഞ 20 വർഷമായി ഈ സ്ഥാപനത്തിൽ അക്കൗണ്ടന്റായി ജോലി ചെയ്തു വരികയായിരുന്നു സുബീർ. 2025 ഏപ്രിൽ 20 മുതൽ 2026 ഫെബ്രുവരി 27 വരെയുള്ള പത്ത് മാസ കാലയളവിലാണ് കേസിനാസ്പദമായ സംഭവം നടന്നത്.
കടയിലെ സാധനങ്ങൾ വിറ്റുകിട്ടുന്ന തുക ഇന്ത്യൻ ബാങ്കിന്റെ ഐ.ടി.ആർ. ജംഗ്ഷൻ ശാഖയിലുള്ള അക്കൗണ്ട് വഴി മറ്റ് പല അക്കൗണ്ടുകളിലേക്ക് ട്രാൻസ്ഫർ ചെയ്ത് മാറ്റിയാണ് ഇയാൾ തട്ടിപ്പ് നടത്തിയത്. പല തവണകളായി ആകെ 1,37,86,278 (ഒരു കോടി മുപ്പത്തേഴ് ലക്ഷത്തി എൺപത്തിയാറായിരത്തി ഇരുനൂറ്റി എഴുപത്തിയെട്ട്) രൂപ ഇയാൾ ക്രമക്കേടിലൂടെ തട്ടിയെടുത്തതായി എഫ്.ഐ.ആറിൽ വ്യക്തമാക്കുന്നു.
മൂവാറ്റുപുഴ പോലീസ് സ്റ്റേഷൻ ഗ്രേഡ് സബ് ഇൻസ്പെക്ടർ ബിനു വർഗീസിന്റെ നേതൃത്വത്തിലാണ് കേസ് അന്വേഷണം പുരോഗമിക്കുന്നത്. ഭാരതീയ നാഗരിക് സുരക്ഷാ സംഹിത പ്രകാരം കുറ്റകരമായ വിശ്വാസവഞ്ചന, ചതി എന്നീ വകുപ്പുകൾ ചുമത്തിയാണ് പോലീസ് കേസ് രജിസ്റ്റർ ചെയ്തിരിക്കുന്നത്.
