കൊച്ചി: ബോഡി ബിൽഡിങ് ലോക ചാമ്പ്യൻ ചിത്തരേഷ് നടേശൻ, ലോക പുരുഷ സൗന്ദര്യ മത്സരത്തിലെ വെള്ളി മെഡൽ ജേതാവ് ഷിനു ചൊവ്വ എന്നിവർക്ക് ആംഡ് പൊലീസ് ഇൻസ്പെക്ടർമാരായി നേരിട്ട് നിയമനം നൽകിയതുമായി ബന്ധപ്പെട്ട വിവാദത്തിൽ ഹൈക്കോടതി ഇടപെടൽ. ഈ നിയമനങ്ങളിൽ വിജിലൻസ് അന്വേഷണം നടത്തുന്നത് സംബന്ധിച്ച് രണ്ടാഴ്ചക്കകം തീരുമാനമറിയിക്കാൻ സംസ്ഥാന സർക്കാരിന് ഹൈക്കോടതി നിർദേശം നൽകി.
വിജിലൻസ് അന്വേഷണം ആവശ്യപ്പെട്ട് അഡ്വ. കെ.എം. ഷാജഹാൻ നൽകിയ നിവേദനത്തിൽ അടിയന്തരമായി തീരുമാനമെടുക്കാനാണ് ജസ്റ്റിസ് എ. ബദറുദ്ദീൻ അഡീഷനൽ ചീഫ് സെക്രട്ടറിക്ക് നിർദേശം നൽകിയത്.
കേസിന്റെ പശ്ചാത്തലം:
കായികതാരങ്ങളായ ചിത്തരേഷ് നടേശനും ഷിനു ചൊവ്വക്കും ചട്ടങ്ങൾ മറികടന്ന് പൊലീസിൽ നേരിട്ട് ഇൻസ്പെക്ടർമാരായി നിയമനം നൽകിയതിൽ ക്രമക്കേടുണ്ടെന്നാണ് ഹരജിക്കാരന്റെ ആരോപണം. ഇതുസംബന്ധിച്ച് കഴിഞ്ഞ ഏപ്രിൽ 21ന് ചീഫ് സെക്രട്ടറിക്കും, പിന്നീട് വിജിലൻസ് ഡയറക്ടർക്കും ആഭ്യന്തര മന്ത്രിക്കും പരാതി നൽകിയിട്ടും യാതൊരുവിധ നടപടിയും ഉണ്ടാകാത്തതിനെ തുടർന്നാണ് ഹരജിക്കാരൻ ഹൈക്കോടതിയെ സമീപിച്ചത്.
ഹരജി പരിഗണിച്ച കോടതി, ഉന്നയിക്കപ്പെട്ട പരാതിയിൽ രണ്ടാഴ്ചയ്ക്കകം കൃത്യമായ നിലപാട് അറിയിക്കാൻ ആഭ്യന്തര വകുപ്പ് അഡീഷണൽ ചീഫ് സെക്രട്ടറിക്ക് നിർദേശം നൽകുകയായിരുന്നു.
