തിരുവനന്തപുരം: കേരളത്തിന്റെ ജനനായകൻ വി. എസ്. അച്യുതാനന്ദന്റെ സ്മൃതി മണ്ഡപത്തിന്റെ നിർമ്മാണ പ്രവൃത്തികൾ ദ്രുതഗതിയിൽ പുരോഗമിക്കുന്നു. പ്രശസ്ത ആർക്കിടെക്ട് ശങ്കറിന്റെ നേതൃത്വത്തിലുള്ള വിദഗ്ദ്ധ സംഘമാണ് സ്മൃതി മണ്ഡപത്തിന്റെ രൂപരേഖ തയ്യാറാക്കി നിർമ്മാണത്തിന് മേൽനോട്ടം വഹിക്കുന്നത്. സാങ്കേതികവും ഭരണപരവുമായ ഒട്ടനവധി കടമ്പകൾ തരണം ചെയ്ത്, നിശ്ചിത സമയത്തിനകം തന്നെ നിർമ്മാണം പൂർത്തിയാക്കാനുള്ള ഊർജ്ജിതമായ ശ്രമത്തിലാണ് അണിയറപ്രവർത്തകർ.
വി. എസിന്റെ രാഷ്ട്രീയ പ്രസ്ഥാനം തന്നെയാണ് ഈ സ്മൃതി മണ്ഡപത്തിന്റെ നിർമ്മാണ ചുമതല ഏറ്റെടുത്തിരിക്കുന്നത്. ചരിത്രമുറങ്ങുന്ന വലിയ ചുടുകാട്ടിന്റെ മണ്ണിൽ ഉയരുന്ന ഈ സ്മൃതി മണ്ഡപം വരുംതലമുറകൾക്ക് എന്നും ആവേശം പകരുന്ന ഒന്നായി മാറുമെന്നുറപ്പാണ്.
നിർമ്മാണത്തിന്റെ അടുത്ത ഘട്ടങ്ങളും വിശേഷങ്ങളും വരും ദിവസങ്ങളിൽ നിങ്ങളുമായി പങ്കുവെക്കുമെന്ന് വി. എസിന്റെ മകൻ വി. എ. അരുൺ കുമാർ സോഷ്യൽ മീഡിയ കുറിപ്പിലൂടെ അറിയിച്ചു.
