പള്ളുരുത്തി: വീട് വെക്കാനായി എടുത്ത വായ്പയുടെ ഗഡുക്കൾ മുടങ്ങിയതിനെ തുടർന്ന്, വിധവയായ വീട്ടമ്മയും കുടുംബവും താമസിക്കുന്ന വീട് ജപ്തി ചെയ്യാനൊരുങ്ങി സ്വകാര്യ ധനകാര്യ സ്ഥാപനം. പള്ളുരുത്തി പെരുമ്പടപ്പ് കോണത്ത് നാലുകണ്ടത്തിൽ വീട്ടിൽ സജിതയും കുടുംബവുമാണ് ജപ്തി ഭീഷണിയെ തുടർന്ന് ആത്മഹത്യയുടെ വക്കിൽ എത്തിനിൽക്കുന്നത്. വിധവയായ സജിത, ഭർത്താവ് ഉപേക്ഷിച്ച മകൾ, വിദ്യാർത്ഥികളായ പേരക്കുട്ടികൾ എന്നിവരടങ്ങുന്നതാണ് ഈ കുടുംബം.
2017-ലാണ് സജിത വീട് നിർമാണത്തിനായി സ്വകാര്യ ബാങ്കിൽ നിന്നും 10 ലക്ഷം രൂപ വായ്പയെടുത്തത്. തുടർന്ന് കഠിനാധ്വാനത്തിലൂടെ 13 ലക്ഷത്തി എൺപതിനായിരം രൂപയോളം ഇവർ ബാങ്കിലേക്ക് തിരിച്ചടയ്ക്കുകയും ചെയ്തു. എന്നാൽ, പലിശയും പിഴപ്പലിശയും കയറി ഒടുവിൽ വായ്പ കുടിശ്ശികയാവുകയായിരുന്നു. ഒരു പെട്ടിക്കട നടത്തിയാണ് സജിത കുടുംബം പുലർത്തുന്നത്. ഇതിനിടെ ഒന്നാം ക്ലാസിൽ പഠിക്കുന്ന പേരക്കുട്ടിക്ക് തലയ്ക്കുള്ളിൽ രോഗം ബാധിച്ചതിനെ തുടർന്ന് ശസ്ത്രക്രിയ നടത്തേണ്ടി വന്നു. കുട്ടിയുടെ കനത്ത ചികിത്സാച്ചെലവും മരുന്നിനുള്ള പണവും കണ്ടെത്താൻ ബുദ്ധിമുട്ടിയതോടെയാണ് ലോൺ അടവ് ഏതാനും മാസങ്ങൾ മുടങ്ങിയത്.
വാതിൽ കുത്തിത്തുറന്ന് ബാങ്ക് അധികൃതർ വീട് പൂട്ടി
കഴിഞ്ഞ ദിവസം വീട്ടിൽ ആരുമില്ലാതിരുന്ന സമയത്ത് ബാങ്ക് അധികൃതരെത്തി വീടിന്റെ വാതിൽ കുത്തിത്തുറന്ന് രണ്ട് താഴുകൾ ഇട്ട് പൂട്ടി സീൽ ചെയ്യുകയായിരുന്നു. വിവരമറിഞ്ഞ് സ്ഥലത്തെത്തിയ പൊതുപ്രവർത്തകർ പൂട്ട് തല്ലിപ്പൊട്ടിച്ചാണ് സജിതയെയും കുടുംബത്തെയും വീട്ടിനകത്തേക്ക് കയറ്റിയത്.
ഇത്രയും തുക തിരിച്ചടച്ചിട്ടും ഇനി 13 ലക്ഷം രൂപ കൂടി 20 ദിവസത്തിനകം അടയ്ക്കണമെന്നാണ് ബാങ്ക് അധികൃതർ നൽകിയിരിക്കുന്ന കർശന നിർദ്ദേശം. ഇല്ലെങ്കിൽ ജപ്തി നടപടികളുമായി മുന്നോട്ട് പോകുമെന്നും അവർ മുന്നറിയിപ്പ് നൽകിയിട്ടുണ്ട്. “ഈ രോഗിയായ കുട്ടിയെയും കൊണ്ട് ഞാൻ എങ്ങോട്ട് പോകാനാണ്? ആത്മഹത്യയല്ലാതെ എന്റെ മുന്നിൽ മറ്റ് വഴികളൊന്നുമില്ല,” സജിത കണ്ണീരോടെ പറയുന്നു.
സഹായ സമിതി രൂപീകരിച്ചു
ദുരിതത്തിലായ ഈ കുടുംബത്തെ സംരക്ഷിക്കുന്നതിനായി പ്രദേശത്ത് ജനപ്രതിനിധികളുടെയും പൊതുപ്രവർത്തകരുടെയും നേതൃത്വത്തിൽ സഹായ സമിതി രൂപീകരിച്ചിട്ടുണ്ട്. ദീപു ജോൺ എം.എൽ.എ, വാർഡ് കൗൺസിലർ സി.ആർ. ബിജു എന്നിവർ രക്ഷാധികാരികളായും, മുൻ കൗൺസിലർ അഭിലാഷ് തോപ്പിൽ ചെയർമാനായും, പൊതുപ്രവർത്തകൻ കെ.എ. അഫ്സൽ കൺവീനറായും കമ്മിറ്റി രൂപീകരിച്ച് കുടുംബത്തെ സഹായിക്കാനുള്ള ശ്രമങ്ങൾ ആരംഭിച്ചിട്ടുണ്ട്. ധനകാര്യ സ്ഥാപനത്തിന്റെ ക്രൂരമായ നടപടിക്കെതിരെ നാട്ടുകാർക്കിടയിൽ പ്രതിഷേധം ശക്തമാണ്.
