തിരുവനന്തപുരം: കേരളത്തിലെ വിദ്യാലയങ്ങളും കലാലയങ്ങളും കേന്ദ്രീകരിച്ച് വളരുന്ന ലഹരിമാഫിയയുടെ നെറ്റ്വർക്ക് തകർക്കുക എന്ന ലക്ഷ്യത്തോടെ സംസ്ഥാന പൊലീസ് നടപ്പാക്കിയ ‘ഓപ്പറേഷന് തൂഫാന്: ദി നാര്കോ ഹണ്ട്’ പദ്ധതിക്ക് വൻ വിജയം. ജൂൺ രണ്ട് മുതൽ ആരംഭിച്ച ഈ പ്രത്യേക ഡ്രൈവ് ഒരു മാസം പിന്നിടുമ്പോൾ 30 കോടി രൂപ വിലമതിക്കുന്ന നിരോധിത ലഹരിവസ്തുക്കളാണ് സംസ്ഥാനത്തുടനീളം പൊലീസ് പിടിച്ചെടുത്തത്.
ലഹരിക്കെതിരെ വിട്ടുവീഴ്ചയില്ലാത്ത നടപടികളുമായി മുന്നോട്ടുപോയ പൊലീസ്, സംസ്ഥാനമൊട്ടാകെ നടത്തിയ പരിശോധനകളിൽ 5353 കേസുകൾ രജിസ്റ്റർ ചെയ്യുകയും 5736 പേരെ അറസ്റ്റ് ചെയ്യുകയും ചെയ്തിട്ടുണ്ട്.
പിടിച്ചെടുത്ത ലഹരിവസ്തുക്കളുടെ വിവരങ്ങൾ:
ഒരു മാസത്തെ പരിശോധനയിൽ പിടിച്ചെടുത്ത മയക്കുമരുന്നുകളുടെ വിപുലമായ ശേഖരം ഇപ്രകാരമാണ്:
- എം.ഡി.എം.എ (MDMA): 3706.743 ഗ്രാം
- കഞ്ചാവ്: 392.100 കിലോ
- ഹാഷിഷ് ഓയിൽ: 3776.039 ഗ്രാം
- ഹാഷിഷ്: 4.85 ഗ്രാം
- ബ്രൗൺ ഷുഗർ: 657.219 ഗ്രാം
- മെത്താഫെറ്റാമിൻ: 12.6709 ഗ്രാം
- ഹെറോയിൻ: 31.23 ഗ്രാം
- കഞ്ചാവ് ചെടികൾ: 428 എണ്ണം
- എൽ.എസ്.ഡി സ്റ്റാമ്പുകൾ: 11 എണ്ണം
- നൈട്രോസെപാം: 56 ഗ്രാം
- ഓപിയം: 25.23 ഗ്രാം
- ചരസ്സ്: 1.6 ഗ്രാം
- കഞ്ചാവ് ബീഡികൾ: 3294 എണ്ണം
നിയമനടപടിക്കൊപ്പം ബോധവത്കരണവും പുനരധിവാസവും
കേവലം അറസ്റ്റിലും കേസ് രജിസ്റ്റർ ചെയ്യലിലും മാത്രം ഒതുങ്ങുന്നതല്ല ഈ പദ്ധതി. ലഹരിവ്യാപനത്തിനെതിരെ കർശന നിയമനടപടികൾ സ്വീകരിക്കുന്നതിനൊപ്പം തന്നെ ശക്തമായ ബോധവത്കരണ പ്രവർത്തനങ്ങളും ഇതിന്റെ ഭാഗമായി നടക്കുന്നുണ്ട്.
ഇതിന്റെ ഭാഗമായി പൊലീസ് സംഘടിപ്പിച്ചത് 6005 ബോധവത്കരണ ക്ലാസുകളും *279 കൗൺസിലിങ്ങുകളുമാണ്. കടുത്ത ലഹരിബാധയിൽപ്പെട്ട 15 പേരെ വിദഗ്ധ ചികിത്സയ്ക്കായി പുനരധിവാസ കേന്ദ്രങ്ങളിലേക്ക് മാറ്റി. കൂടാതെ സ്കൂൾ, കോളജ് പ്രൊട്ടക്ഷൻ ഗ്രൂപ്പുകളുടെ നേതൃത്വത്തിൽ ക്യാമ്പസുകൾ കേന്ദ്രീകരിച്ച് *5100 ബോധവത്കരണ പരിപാടികളും സംഘടിപ്പിച്ചു കഴിഞ്ഞു. ലഹരിക്ക് അടിമപ്പെട്ടവരെ കൃത്യമായ കൗൺസിലിങ്ങിലൂടെയും പുനരധിവാസത്തിലൂടെയും സാധാരണ ജീവിതത്തിലേക്ക് മടക്കിക്കൊണ്ടുവരിക എന്ന മാനുഷികമായ ലക്ഷ്യം കൂടി ഈ പദ്ധതിക്കുണ്ട്.
“ലഹരിമാഫിയക്കെതിരെയുള്ള ഈ ‘കൊടുങ്കാറ്റ്’ വരും മാസങ്ങളിലും കൂടുതൽ ശക്തമായിത്തന്നെ തുടരും.”
— രവാഡ ചന്ദ്രശേഖർ (സംസ്ഥാന പൊലീസ് മേധാവി)
